Sekretária Estadu Seguransa
Sosial portugeza, Cláudia Joaquim, promete ona iha loron-segunda ne'e katak
Portugal sei kontinua apoia projetu sira asaun sosial nian iha Timor-Leste,
hamutuk ho inisiativu sira ne'ebé agora daudaun fó benefísiu ba ema rihun lima
resin.
Iha entrevista ne'ebé halo ba
Lusa, iha Díli, durante vizita iha loron hirak ne'e iha Timor-Leste, Cláudia
Joaquim refere ona katak programa foun hosi koperasaun bilateral iha área,
ne'ebé sei asina iha semana ne'e, sei iha baze iha parte tolu: "reforsu institusional,
luta hasoru pobreza no empregu ho formasaun profisional".
Portugal fó mós apoiu ba kriasaun
hosi Sistema Seguransa Sosial timoroan nian no lejislasaun rasik no definisaun
hosi modelu ne'ebé maka uza daudaun iha nasaun.
Demokrasia, Estadu direitu ho
direitu ema nian, dezenvolvimentu ema nian ho halakon pobreza, direitu labarik
sira nian ho igualdade jéneru nian hanesan baze prinsipal tolu hosi programa
setorial apoiu Portugal nian, ho asaun sira iha área sosial no iha kapasitasaun
institusional, haktuir hosi Governu timoroan.
Dezde tinan 2002, finansiamentu
ne'ebé fó hosi Ministériu Traballu ho Solidariedade Sosial (MTSS), iha ámbitu
hosi koperasaun bilateral ho Timor-Leste, aumenta ba euro millaun 19 resin.
Besik 60% resin destina ona hodi
kombate pobreza, 35% ba empregu no formasaun profisional no 5% ba reforsu ho
kapasitasaun institusional, no abranje projetu hamutuk 32.
Agora daudaun Portugal apoia
instituisaun sia iha munisípiu ualu no iha Rejiaun Administrativu Espesial
Oecusse-Ambeno (RAEOA), dinamiza postu serbisu hamutuk 150 resin no iha
intervensaun iha ekipamentu sosial hamutuk 11.
Finansiamentu hosi Portugal iha
ámbitu hosi koperasaun to'o ba labarik sira ho joven sira hamutuk rihun lima
sira no katuas-ferik sira hamutuk atus rua resin, haktuir hosi MTSS.
Cláudia Joaquim refere katak
"iha vontade ida hodi kontinua fó apoiu ba projetu sira ne'ebé hetan ona
apoiu" no, tanba parseria ho Ministériu Solidariedade Sosial ho Inkluzaun
timoroan nian, iha posibilidade "apoiu tan projetu sira no aumenta iha
ámbitu intervensaun nian".
Área ida ne'ebé iha buka maka'as
no kontinua hanesan "fundamental" maka kapasitasaun institusional,
tuir nia haree, hodi rekorda katak dirijente sira hosi serbisu prinsipal sira
no organizmu sira hosi Seguransa Sosial portugeza halo ona vizita ba
Timor-Leste.
Ne'e implika duni
"adaptasaun" tanba realidade sira hosi nasaun rua la hanesan, maski,
hanesan ezemplu, Timor-Leste bele hatene esperiénsia portugeza sira iha
dezenvolvimentu ho ampliasaun hosi rede hosi ekipamentu sosial sira.
"Iha ne'e, iha Timor-Leste,
sei presiza hahú hosi ne'ebá, aumenta kobertura iha termu teritorial sira no
iha kuidadu maka'as no objetivu iha kualidade no ezijénsia hosi ekipamentu
sira", nia hatete.
Sekretária Estadu portugeza haree
katak iha kazu balun apoia ona projetu sira iha pasadu ne'ebé agora sai ona
autónomu liu, hodi permiti kanaliza ajuda ba inisiativa sira seluk.
"Liuliu, hanesan vontade
hosi ema timoroan sira maka tenki prevalese. Ita bele avalia no ami avalia
projetu sira, sustentabilidade no viabilidade, maibé desizaun, identifikasaun
hosi nesesidade sira hanesan iha ema timoroan sira nia liman", nia hatete.
Cláudia Joaquim vizita ona sentru
sira hosi asaun sosial iha Díli, Manatuto, Baucau ho Oecusse, inaugura ona iha
loron-sábadu Bloku dahuluk hosi Sentru Komunitáriu Same nian, iha súl Díli
nian, ne'ebé selu ho apoiu portugés.
Pontu importante ida hosi vizita
ne'e akontese iha loron-tersa bainhira hala'o Konferénsia ida kona-ba Seguransa
Sosial ne'ebé promove hosi Ministériu Solidariedade Sosial ho Inkluzaun ho
Institutu Nasional Seguransa Sosial timoroan nian.
Konferénsia sei analiza aspetu
sira hanesan koperasaun bilateral iha área ne'e no sistema hosi seguransa
sosial timoroan nian.
Akordu koperasaun nian entre
nasaun rua sei asina iha momentu ne'e.
Lusa | iha SAPO tl
Sem comentários:
Enviar um comentário