DILI, (TATOLI) - Xefe Estadu
Maiór FALINTIL-Forsa Defeza Timor-Leste (F-FDTL), Majór Jenerál Lere Anan
Timur, preokupa ho komunidade balun kontinua soe fo’er iha sidade laran, maski
governu hasai ona despaisu zero toleránsia ba lixu no mós okupa dalan públiku.
Lere konsidera, komunidade
seidauk konsiente ba limpeza no seidauk distinge entre dalan públiku no
proprietáriu pesoál.
Lere hateten, buat hirak ne’e
akontese tanba membru governu ne’ebé toma konta ba limpeza no ordenamentu
sidade toba dukur.
“Ezemplu, iha parte Hera ne’ebá
ne’e estrada ne’ebé Estadu haluan ne’e la’ós atu ba halo uma iha ne’ebá no tasi
ninin sira iha Metiaut to’o area Branca ne’e nakonu de’it ho uma, maibé ema
ne’ebé toma konta ba ordenamentu ne’e dukur tiha no bainhira ema halo tiha
andár maka foin hakfodak atu ba sobu. Ida ne’e signifika responsabilidade
laiha,” hateten Majór Jenerál Lere Anan Timur ba jornalista sira iha Palásiu
Prezidente Nicolau Lobato, Bairru Pité, Kuarta (24/4/2019).
Nia hatutan, iha edifísiu
Ministériu Negósiu Estranjeiru nia oin, Praia dos Coqueiros, mós agora komunidade
fa’an hikas katupa, ikan tunu no na’an to’o tiha tasi ibun. Nia dehan, se
governu fó duni kna’ar ida ne’e ba forsa armada, sei muda komunidade ne’ebé
okupa dalan públiku no fatin turizmu.
“Ita-nia komunidade dalaruma la
kontente ho desizaun muda ne’e, maibé laiha buat ida. Ita hakarak ijiene, ita
hakarak sidade ne’e sai furak, ita tenke hadi’a maski hasoru risku”, Lere
afirma tan.
Jornalista: Xisto Freitas | Editór:
Francisco Simões
Xefe Estadu FALINTIL-Forsa Defeza
Timor-Leste (F-FDTL), Maiór Jenerál Lere Anan Timur, ba jornalista sira iha
Palásiu Prezidensiál Nicolau Lobato Bairru Pité, kuarta, (27/2/2019). Imajen
António Gonçalves
Sem comentários:
Enviar um comentário