Eis-Prezidente timoroan José
Ramos-Horta hatete iha loron-kuarta ne'e katak atake terorista sira ne'ebé
akontese foin lalais ne'e iha Sri Lanka hanesan sinal hosi estremizmu violentu
iha Ázia ne'ebé ameasa sira ho atake sira hasoru étnika minoria sira ho
relijiozu sira kontinua akontese beibeik.
"Ameasa sira ho atake sira
kontra minoria étnika ho relijiozu sira hanesan akontese beibeik iha Ázia,
liuliu iha sudeste Ázia nian. Dalabarak mosu liuhosi rede sosial sira hosi ator
relijiozu sira ho polítiku sira ne'ebé laiha responsabilidade ka hosi grupu
marjinal sira ne'ebé hamosu paixaun sira, ódiu ho violénsia", nia afirma
iha Díli.
Iha intervensaun ida iha enkontru
rejional kona-ba diplomasia preventivu ho alerta prekose, Prémiu Nobel Dame
nian hatete katak desizaun estraordináriu hosi Sri Lanka hodi blokeia rede
sosial sira hafoin atentadu sira, "reflete aumentu hosi preokupasaun
global, liuliu entre governu sira, kona-ba kapasidade hosi rede sira hosi
propriedade norte-amerikanu hodi hamosu violénsia".
Eis-xefe Estadu refere ba
atentadu bombista ualu ne'ebé akontese iha loron-domingu ne'ebé oho ona,
pelumenus, ema na'in 359 no halo ona ema na'in 500 resin kanek no tuir polísia
katak kaer ona suspeitu na'in 58.
Autoridade sira atribui ona atake
sira ba grupu estremista islámiku lokal, National Thowheeth Jama'ath, maski
sira konsidera katak grupu hetan apoiu internasional.
Iha medida ida ne'ebé fó sai
lalais hafoin atake sira, autoridade sira hosi Sri Lanka blokeia ona asesu sira
ba rede sosial sira hanesan Facebook ho Whatsapp.
Ramos-Horta subliña ona katak
antes rede sosial sira, "líder polítiku sira, komunitáriu sira ho
relijiozu sira ne'ebé laiha responsabilidade uza dalan ida ne'ebé báziku liu
maibé efikas ho disponível, rádiu, hodi espalla desinformasaun no bosok maka'as
sira, hodi hamosu tauk no violénsia".
Nia refere katak ezemplu hosi
asaun ne'e maka jenosídiu tinan 1994 iha Ruanda ho konflitu sira iha Bósnia,
"trajédia sira ne'ebé akontese iha parte balun tanba uzu intensional hosi
dalan sira komunikasaun nian".
Maibé nia sustenta katak bainhira
estasaun rádiu ida ne'ebé maka "transmiti mensajen sira ódiu ho violénsia
nian" bele taka lalais, "hanesan susar tebes ba governu sira hodi
adopta lei sira ne'ebé regula rede sosial sira no ne'ebé garanti katak sira nia
proprietáriu estranjeiru, ne'ebé hetan lukru, no utilizador lokal sira hanesan
responsável ba sira nia asaun".
José Ramos-Horta ko'alia iha Díli
iha abertura hosi enkontru ida hosi Fórum Rejional hosi Asosiasaun hosi Nasaun
Sudeste Aziátiku sira (ASEAN) kona-ba papel hosi diplomasia preventivu no
alerta préviu sira iha rezolusaun hosi konflitu sira, prezidi hamutuk hosi
Timor-Leste, Indonézia, Estadus Unidus ho Nova Zelándia.
Enkontru loron tolu nia objetivu
maka "aprofunda no hadi'a komprensaun hosi prinsípiu hosi diplomasia
preventivu sira" no "buka dalan sira kona-ba oinsá ASEAN bele reforsa
kapasidade hodi impede aumentu hosi konflitu rejional sira liuhosi implantasaun
hosi dalan sira alerta antes nian no resposta antesipadu".
Eis-Prezidente timoroan hatete
katak iha tempu rede sosial sira nian "konflitu ida bele hetan lalais
asesu ho publikasaun ba boatu sira no insendiáriu sira hosi seguidor sira hodi
grupu étniku ka relijiozu ruma ne'ebé iha baze iha fatin ne'ebé de'it" iha
mundu no ne'ebé hakarak "hamosu tensaun sira ho konflitu sira iha nia
nasaun rasik ka iha nasaun sira seluk".
"Facebook ho dalan
komunikasaun sira ne'ebé hanesan hanesan fasilitador krítiku sira hosi aumentu
ba rasismu no xenofobia, tanba fornese plataforma sira ne'ebé livre ba demagogu
sira ho estremista sira hodi rekruta, akonsella ho hala'o atake terorista
sira", nia subliña.
Nia afirma katak nune'e maka
importante haree fali dalan internasional sira ho rejional sira ne'ebé iha
kona-ba prevensaun ba konflitu sira no rezolusaun hosi konflitu sira, liuliu
tanba la konsege hatán ho di'ak ba foku foun sira hosi tensaun ho konflitu.
Nia destaka ona katak to'o agora
dalan sira ne'e "iha de'it ligasaun ba kauza tradisional sira konflitu
nian, liuliu, disparidade sosial sira, dezempregu, kiak maka'as, persepsaun ho
resentimentu kona-ba diskriminasaun ka eksluzaun real ka persebidu, konflitu
étniku ka tribu sira nian, konflitu sira kona-ba fronteira sira no rekursu
sira, konflitu sira ne'ebé mosu ho rivalidade rejional sira", no seluk tan.
"ONU ho instituisaun
multilateral sira, hanesan UE, OSCE [Organizasaun ba Seguransa ho Koperasaun
iha Europa], UA [Uniaun Afrikanu], OEA [Organizasaun hosi Estadu Amerikanu
sira], Liga hosi Estadu Árabe sira ho ASEAN, iha esperiénsia maka'as no,
dalaruma, uza rekursu importante sira hodi rezolve konflitu sira entre Estadu
sira. Maibé eskala hosi konflitu intra-estatal sira no nia natureza sensível
hamosu susar ba tentativa sira prevensaun nian no mediasaun hosi fórum rejional
sira ho estra-rejional sira", nia hatete.
Partisipa iha reuniaun ne'ebé
halo iha Díli to'o loron-sesta reprezentante sira hosi membru sira hosi Fórum
Rejional ASEAN nian, liuliu Austrália, Bangladexe, Brunei, Kamboja, Kanadá,
Xina, Koreia-Súl, Koreia-Norte, Estadus Unidus, Índia, Indonézia, Japaun, Laos,
Malázia, Mongólia, Myanmar, Nova Zelándia, Pakistaun, Papua Nova Guiné,
Filipina, Rúsia, Singapura, Sri Lanka, Tailándia, Timor-Leste, Uniaun Europeia
ho Vietname.
Enkontru iha mós reprezentante
hosi Institutu ASEAN ba Dame ho Rekonsiliasaun no hosi Grupu Ema Eminente sira,
instituisaun sira ho organizasaun nasional sira ho rejional sira ne'ebé envolve
iha alerta prekose no iha dame ho seguransa, nune'e mós ema sira ne'ebé maka
serbisu hamutuk ho feto sira, joven sira ho populasaun minoritáriu sira.
Lusa | SAPO TL
Sem comentários:
Enviar um comentário