DILI, (TATOLI) – Ministru
Transporte no Komunikasaun, José Agostinho da Silva, foin lais ne’e, halo
vizita kortezia ida iha Malázia hodi haree posibilidade atu iha akordu
bilateral iha área transporte aériu.
Daudaun ne’e, parte rua finaliza
ona minuta akordu no Ministru José Agostinho da Silva, rasik konvida ona nia omólogu
Ministru Transporte Malázia, Anthony Loke Siew Fook, para bele finaliza
dokumentu iha tempu badak nia laran iha Timor-Leste.
“Parte tékniku Governu Malázia
sira konsege finaliza kontextu dokumentu Air Service Agreement (Akordu
Servisu Aériu)”, informa Ministru José Agostinho da Silva, ba Ajénsia TATOLIiha
Palásiu Governu, Kuarta (24/4/2019).
Durante estadia iha Malázia,
Ministru José Agostinho da Silva, mós vizita kampaun Air Ázia no iha tempu
badak ekipa tékniku hosi operadór vou ne’e sei vizita Timor-Leste hodi halo
peskiza no avaliasaun para iha futuru Air Ázia bele halo operasaun iha
Timor-Leste.
Air Ázia rasik hanesan kompañia
aériu ne’ebé ho folin billete ki’ik liu iha Malázia no hanesan pioneiru viajen
iha Ázia.
Grupu Air Ázia to’o oras ne’e opera
ona vou doméstiku no internasionál hamutuk 65 destinu ne’ebé iha nasaun 25 ona,
inklui Indonézia.
Antes ne’e, liuhosi reuniaun
Konsellu Ministru, ezekutivu sira deside fó podér tomak ba Ministru José
Agostinho hodi asina akordu ba vou internasionál, hodi rezolve problema ne’ebé
oras daudaun ema hotu preokupa ho folin billete ne’ebé aas ba beibeik.
Jornalista: Julia Chatarina | Editór:
Francisco Simões
Imajen: Ministru Transporte no
Komunikasaun, José Agostinho da Silva. Imajen António Goncalves
Sem comentários:
Enviar um comentário