Avelino Coelho: “Karreta estadu labele tula povu ne’e kontra lei”

DILI, 08 agostu 2020 (TATOLI) -- Universidade da Paz (UNPAZ), ohin, realiza semináriu nasionál ho tema “Movimentu Patriotizmu Konstitusionál: Konsiénsia Krítika ba Nasaun” ne’ebé aprezenta Pe. Martinho Gusmão, Pe. Domingos Maubere, Avelino Coelho no dosente UNPAZ Fernandos Dias Gusmão sai oradór.

Eis Sekretáriu Konsellu Ministru, Avelinho Coelho, hateten Esatdu halo lei hodi bandu karreta estadu labele tula povu ne’e kontra lei no kontra argumentu povu mak estadu no povu mak estadu.

Avelino ne’ebé defende marxismo-leninismo ne’e fundamenta konseitu marxista-leninista dehan estadu ne’ebé minoria organizada hodi esplora maioria. Ne’e konseitu, konkorda ka la konkorda ne’e diskutível.

“Bahasa karik dehan nune’e kaum minoritas yang mengorganisir diri atas nama negara untuk menindas kaum maioritas. Ne’e postuladu. Iha konseitu rua saida mak estadu, konseitu ida dehan organizasaun polítika sidadaun define Timor-Leste ne’e estadu mak povu no povu mak estadu. Halo fali lei dehan karreta estadu labele tula olu povu ne’e kontra lei,” Avelino Coelho ko’alia iha ámbitu semináriu ne’ebé organiza hosi UNPAZ, sábadu ne’e.

Maske Avelino Coelho envolve direta iha momentu deskuti lejizlasaun maibé la fundamenta ninia pareser iha prosesu ne’e.

“Kuandu ami diskute Estadu atu halo lejizlasaun karreta estadu labele tula povu, labele tula kondutór nia família, povu la’o iha estrada karik labele tula, ne’e kontradisaun iha pensamentu polítiku no jurídiku.

Se estadu mak povu no povu mak estadu, povu mak na’in ba estadu, nia mak parte integrante ba estadu, nusá mak karreta estadu labele tula fali kondutór nia oan sira. Ne’e problema,” Avelinho Coelho hateten.

Avelino fó ezemplu, karreta estadu ne’ebé hakerek Ministériu Agrikultura labele tula família ne’e problema tanba Governu órgaun dinámika.

“Ne’e kontradisaun ne’ebé ita hamosu iha sosiedade, mau ke kiri maju, mau ke kanan senang, ne’e problema ne’ebé ita hasoru iha prosesu saida mak estadu. Demokrasia ninia sasukat mak minoria submete ba maioria,” nia dehan.

Entretantu, estudante UNPAZ, Rosalino dos Santos, apoia pensamentu hodi Avelino Coelho ne’e tanba estadu mak povu no povu mak estadu entaun prosesu lejilzasaun sira tenke tuir konseitu ne’e.

“Ha’u pesoál konkorda ho pensamentu oradór Avelino Coelho nian tanba ita halo lejizlasaun ida tenke apár ho ita-nia situasaun reál iha sosiedade Timorense, ita labele halo lei ida hanesan fali lei ne’ebé aplika nasaun avansadu sira. La’ós dehan labele maibé ita iha prosesu konstrusaun estadu entaun presiza haree didi’ak,” dehan Rosalino dos Santos ba Agência TATOLI hafoin semináriu nasionál ne’e ramata.

Nia akresenta, durante ne’e servidór estadu balun mak sai arguidu ho lei ne’e tanba realidade kondutór lori karreta estadu hodi tula nia família hodi motiva nia aman ka família mate, entaun iha dalan autoridade seguransa prende no hamosu problema.

“Lei ne’e kontra ona ita-nia konseitu estadu mak povu no povu mak estadu. Se estadu mak povu entaun veíkulu estadu nian tenke perténsia ba povu hotu bainhira hetan susar ruma,” nia hateten.

Jornalista: Evaristo Soares Martins | Editór: Cancio Ximenes