Lere: Labele Koko Halakon Falintil no Fretilin

Tempo Timor (Dili) -- Xefe Estadu Maior Falintil Forsa Defeza Timor-Leste (F-FDTL) Maijor Jeneral Lere Anan Timur konsidera ema balun koko hela atu halakon istoria Falintil no Fretilin husi povu Timor-Leste nia hanoin. 

Tuir Lere, ema balun hahu hatete katak, Timor-Leste konsege hetan vitoria ba ukun rasik an tanba referendu, maibe haluha tiha katak atu to'o iha referendu presiza luta naruk no boot ida. 

Liu husi abertura ba tour F-FDTL relasiona ho loron Falintil ne'ebe monu iha 20 Agostu, Lere dehan, ohin loron, ema balun hakarak halakon istória uluk nian, tanba sira hakarak istória Timor-Leste hahú husi pregu. 

"Imi tenke hanoin, naran iha Falintil no Fretilin labele lakon iha povu nia hanoin. Tanba ohin loron ita hatene katak, balun hakarak halakon istória uluk nian, hakarak hamosu istória foun, nega istória uluk nian, sira hakarak hahú husi pregu dehan referendu," dehan Lere iha Kuartel Jerál Fatuhada, Dili, Sábadu (08/08). 

Lere hatete, referendu ne'e iha tanba prosesu naruk ida, tanba ne'e ema ida labele halakon Falintil no Fretilin husi istoria TL. 

"Referendu ida tanba liu husi prosesu naruk la halimar, ne'e mak foin to'o referendu, tanba ne'e mak naran ida Falintil ho Fretilin ema ida labele halakon husi ninia hanoin no fuan laran," nia dehan. 

Nia hatete, maske ohin Fretilin sai ona partidu politiku ida, maibe uluk Fretilin hamutuk ho Falintil mak komanda funu. 

"Ohin loron Fretilin bele sai partidu, maibé uluk nia mak komanda funu hamutuk ho Falintil, mak Timor Leste ba ukun aan," nia dehan.

Entretantu, hodi selebra loron Falintil ba dala 45 ne'e, hahu iha 8 agostu husi rejiaun IV iha Munisípiu Bobonaro, hafoin sei liu iha rejiaun III munisípiu Manufahi, no rejiaun II Karas munisípiu Viqueque, no hakat ba rejiaun I munisípiu Lautem, hafoin fila hikas mai Dili hodi termina iha 13 Agostu 2020.

Imajen: Xefe Estadu Maior Falintil Forsa Defeza Timor-Leste (F-FDTL) Maijor Jeneral Lere Anan Timur, Akompanha husi Ministru Defesa, Filomino Paixao ho Vise komandante FFDTL, Brigadeiru Falur Rate Laek entrega bandeira FALINTL ba membru F-FDTL ida iha kuartel Fatuhada (8/8) | Tempo Timor

Lee mos:

'Guerrilla' FALINTIL Haleu TL Hahú Ona