TL Sai Referénsia Iha Mundu Kona ba Polítika Dezenvolvimentu Igualdade Jéneru

Timor Post (18/08/2020) -- Vise Prezidente Parlamentu Nasionál, Maria Angelina Sarmento, hatete Timor-Leste hetan progresu boot no sai referénsia kona bá polítika dezenvolvimentu igualdade jéneru, hafoin ratifika konvensaun internasionál ka CEDAW iha tinan 18 liubá.

“Timor-Leste sai kedas país ida ne’ebé iha progresu lubuk ida, kompara ho nasaun sira seluk iha mundu ukun an kleur ona, maibé Timor sai mós referénsia ba nasaun sira seluk kona bá polítika dezenvolvimentu igualdade jéneru”, hatete Angelina Sarmento ba jornalista sira hafoin partisipa iha Simpóziu Nasionál CEDAW Tinan 18 Implementasaun CEDAW iha Timor-Leste ne’ebe hala’o Iha Tower Fatu hada, Dili Tersa (18/08).

Deputada adianta, Timor-Leste nia progresu ida mak iha setór polítika, ne’ebé alkansa partisipasaun feto iha vida polítika liuliu feto iha parlamentu nasionál atinje porsentu 40.

“Númeru persentajen ida ne’ebé boot iha nivel CPLP, nune’e mós iha nivel ASEAN maski Timor-Leste hanesan nasaun ida ne’ebé nurak, maibé ninia persentajen ba promosaun igualdade jéneru iha hakarak ida ne’ebé dook”, hatutan eis komisária CNE.

Enkuantu iha parte governu nia haree sei iha dezafiu, entermus membru governu sira ne’ebé hetan nomeasaun polítika ninia persentajen sei ki’ik, tanba iha porsentu 3 de’it iha VIII konstitusionál.

Iha setor edukasaun nia hare iha progresu mós tanba kria ona polítika kona bá 12 eskolaridade obrigatoriu ne’ebé aplika ona ba sidadaun hotu feto no mane.

Iha fali setor ekonómiku nia haree feto barak absolve kampu servisu, maibé hare hosi persentajen feto sei ki’ik kompara iha Timor-Leste.

“Kampu servisu feto ho idade 15 ba leten foin alkansa porsentu 25, enkuantu ba mane sira kuaze absolve porsentu 52 ne’e persentajen ida ne’ebé boot hosi mane iha kampu servisu kompara ho feto,” relata deputada.

Iha setór justisa feto barak nia hare sei iha difikuldade atu asesu ba justisa liuliu ba iha tribunal atu bele hetan justisa ida ne’ebé feto hakarak, liuliu ba kazu ho krime violénsia doméstika, krime violénsia seksuál no krime sira ligadu ho violénsia bazeia ba jéneru dala barak nia hare feto nia koñesimentu mínimu laiha dalan atu bele asesu ba Justisa ne’ebé feto sira hakarak. Tanba ne’e dala barak feto sira dezanima sira nia kazu la lori ba oin, tanba laiha justisa ba sira nia kazu ho nune’e mak loke dalan ba violénsia doméstika kontinua prevalese iha sosiedade nia let.

Jornalista: Julio Salinas Soares