DOM BASILIO KONSIDERA FRANCISCA-MARIA MADRE ILEGAL

Amo Bispu Dioseze Baucau no Dili, Dom Basilio do Nascimento, konsidera Francisca Fernandes ho Maria Fatima hanesan madre illegal, tanba sira nain rua sai ona husi Congregação Imitutu Jesus (CIJ) no mos Associação Menino Jesus (AMJ).

“Amu Bispu rasik seidauk simu dokumentus legal husi Fransisca ho Marisa. Kuandu ema ida la pertense ona husi kongregasaun ida, laiha buat ida ona ho kongregasaun, nia laos ona membru kongregasaun nian, nein konsagradu. Konsagradu hanesan baptismu maibe laiha konsagradu iha votus kongregasaun ne’e duni sira ema babain. Ba Fransisca Fernandes no Maria Fatima ne’e klaru ona katak labele hatais relijioza ne’e klaru ona, maibe sira nain rua hakarak halo maibe atu hatete deit katak sira nain rua laos madre hatais ne’ebe maka sira nain rua uza ne’e la’os madre nian hakarak uza buat ne’e hanesan baibain, hatais ne’e hotu la tuir lei kanoniku,”Dom Basilio deklara Lia hirak ne’e ba JNDiario iha igreja Parokia Santo Antonio Manatutu, Sesta (12/06).

Dom Basilio esplika, regra sira ne’ebe maka partense ba kongregasaun relijioza ida, sira nia estatuta ne’e vale banhira sira partense ba kongregasaun ida no hela iha komunidade ida.

“Hatais vestuariu kongregasaun nian ida, iha ninia signifikadu ida, beo signifika saida, kor signifika saida, kruz ka medalla ne’ebe maka sira uza signifika saida? ne’e duni ema ida ne’ebe maka dehan reljgiozu ka relijioza partense ba kongregasaun nia hahalok nia karisma tuir kongregasaun haruka liu husi sira nia hatais ne’ebe maka iha signifikadu,”dehan Dom Basilio.

Atu sai hanesan relijioza, Bispu Dom Basilio haktuir, tenke iha estatutu ka husu atu tama fali kongregasaun seluk, entaun se hakarak halo ninian rasik, nia tenke halo fali estatutu ida ba kongregasaun foun ida, define karisma atu servi uma kreda oinsa nomos konstituisaun propriu kongregasaun nian, maibe antes atu hahú tenke iha aprovasaun husi Amo Bispu ba estatutu no konstituisaun proprio kongregasaun nian.

Dom Basilio haklaken, Madre nain rua ne’e inklui madre barak maka sai ona husi kongregasaun maibe hatais nafatin hanesan madre ,buat hirak ne’e la los, sira nafatin hanesan sarani, halo nafatin servisu uma kreda nian,maibe laos relijioza (madre).

Hatan kona-ba Associação Menino Jesus ne’ebe maka sira harii, Dom Basilio hateten, nia rasik lahatene.

“Maske koalia ona ho Amu Bispu matebian Dom Ricardo da Silva maibe koalia deit la vale. Se Dom Ricardo aprova AMJ maibe tenke aprezenta dokumentus sira ne’ebe maka Amu matebian aprova, se Amu Ricardo asina buat ruma ha’u lahatene, se Amu Ricardo asina tenke aprezenta dokumentus ida mai ha’u, maske sira hasoru ona ha’u maibe ha’u dehan ba sira illegal, labele hatais hanesan madre,”afirma Bispu Dom Basilio.

Bispu Dom Basilio dehan tan katak, hanesan sarani la impede katak nia halo karidade, bele moris tuir sarani nian, haree nafatin kiak sira, haree nafatin ferik ho katuas sira, haree nafatin edukasaun, maibe hanesan ema sarani maibe laos ema relijiozu ka religioza ona.eus

Jornal Nacional