PN LA SERIU DISKUTI LEI KAK

Parlamentu Nasional (PN) to’o agora seidauk ajenda lei Komisaun Anti Korupsaun (KAK), tanba lei ne’e budu hela iha gaveta Parlamentu Nasional nian desde Kintu Governu konstitusional to’o agora.

Komisariu Komisaun Anti Korupsaun Aderito Tilman informa katak, instituisaun KAK seidauk kontaktu ho Parlamentu Nasional kona-ba lei KAK ne’ebé tau hela iha Parlamentu Nasional, maibé hanesan individualmente, nia kontaktu ona ho Komisaun A Parlamentu Nasional ne’ebé trata asuntu leis, no sira mós konkorda atu ajensa lalais lei KAK ne’e ba plenaria.

“Lei Anti Korupsaun ne’e, sei iha Parlamentu, Ami mós prepara hela ami nia kontributu lei anti korupsaun ida, kuandu Parlamentu Nasional ajenda ona ba Plenaria, ami mós fó ami nia hanoin kona-ba lei anti korupsaun ne’e,”informa Aderito Tilman ba jornalista iha Palacio Governu, Tersa (16/6), hafoin partisipa iha konsellu ministru.

Aderito esklarese, lei KAK ne’e, kleur ona rai iha meja Parlamentu Nasional no públiku mós hein hela lei ne’e atu aprova lalais.

Antes ne’e, Deputadu Francisco Branco husi bankada FRETILIN mós hatete katak, nia lamenta tebes ho tratamentu Prezidente Parlamentu Nasional, Vicente Guterres nian kona-ba lei anti Korupsaun ne’e.

“Prezidente Parlamentu Nasional mak konsinte korupsaun atu buras, tanba nia tratamentu ba lei anti korupsaun ne’e lahanesan lei sira seluk. Lei sira seluk ne’e tama mai Parlamentu, loron ida rua deit, ajenda ona ba plenaria atu halo diskusaun, maibé lei anti korupsaun ne’e, tau hela iha gabeta Prezidente nian to’o agora,”informa Francisco Branco.

Parlamentu Nasional la fó prioridade ba lei anti korupsaun, maibe kada loron, deputadu sira kontinua hananu korupsaun iha Parlamentu.

Situasaun ida ne’e halo públiku la kompriende, tanbasa mak bele sai hanesan ne’e, lei atu kaer ema sira ne’ebé kada loron ikun naruk bebeik ba korupsaun, maibé Parlamentu Nasional tau tiha ba kotuk, hodi fó fali prioridade ba lei sira seluk ne’ebé ladun importante, no kada loron sira rasik mak hakilar atu labele premiti ema naok ten sira na’ok bebeik Estadu nia osan.cos

Jornal Nacional