HNGV SEI FALTA AIMORUK

Xefi Departemento Farmásia no Nutricão, Dr. Mendes Pinto informa, kuaze semana ida, Hospital Nasional Guido Valadares (HNGV) sei falta aimoruk.

Tanba to’o oras ne’e SAMES seidauk simu aimoruk relasiona ho funsionamentu aprovizionamentu ne’ebe pasa liu husi Ministeriu Saude (MS), la hatene los nia prosesu tenderizasaun to’o iha ne’ebe.

“Aimoruk ne’e ami klasifika ba oin tolu mak, aimoruk esensial, Vital no nesesariu. Aimoruk vital ne’e mak labele stok out ne’e ita labele tolera mais iha ne’e, vital iha deit item 20, aimoruk nesesariu mak barak,” informa Dr. Mendes Pinto ba Jornalista sira iha nia kna’ar fatin, Sesta (3/7) hafoin simu lista aimoruk stok out husi farmasista HNGV.

Total aimoruk ne’ebe oras ne’e stok out mak aimoruk nesesariu no esensial hamutuk besik 120 item.

“Iha ne’e besik 120 item mak menus hanesan aimoruk anti biotik, Amosclap, aimoruk malaria, anti maker uza ba malaria, (obat-obat penenan), aimoruk rumringa, anti kolestrol, aimoruk tramador anti sakit inklui aimoruk vital hanesan Cool Fidrogel (aimoruk ba ran atu labele belit maibe tenki cair), Hidro Cortejia anti hipertensi, anti flamasi no anti tetanus no lubuk ida tan,”haktuir Dr. Mendes.

Dr. Mendes haforsa katak, aimoruk hirak ne’e hakarak ou lakohi tenki iha, kuandu laiha mak mediku sira labele halo buat ida.

Ho problema ne’e, dalan ne’ebe HNGV foti mak supplay alternativa ne’ebe durante ne’e MS hala’o.

“Desde uluk MS halo supply alternativa aimoruk husi apotik Istana Farmasi. Kontratu ne’e hala’o desde uluk no remata iha 2016 mai, ne’ebe ami HNGV kuandu stok out hanesan ne’e ami bele foti urjenti iha ne’eba,”esplika Dr. Mendes.

Maibe iha prosedur balun ne’ebe HNGV persija tuir mak, Farmasia HNGV sei hato’o lista stok out ba iha xefi departementu Farmasia no Diretur Jeral. Depois xefi departementu no diretur ba hala’;o verifikasaun iha SAMES katak, aimoruk hirak ne’e iha ou lae. Karik laiha SAMES sei halo justifikasaun ba HNGV, nune’e HNGV ba hatama lista aimoruk stok out ba iha apotik Istana Farmasi ne’ebe sei hetan asina husi diretur HNGV, nune’e sira bele prepra aimoruk ne’ebe iha lista hodi fasilita HNGV.

Normalmente apotik ne’ebe hala’oo kontratu ho MS tenki prepara aimoruk menus husi loron 14 ba HNGV inkui kada Sentru Saude sira ne’ebe husu urjenti.

HNGV mos prepara ona lista hodi ba justifika iha SAMES, karik SAMES laiha mak HNGV sei foti aimoruk husi Apotik Istana Farmasi.

Atu konfirma ba asuntu ne’e, Diário tenta kontaktu Diretur Nasional Enkaminhamentu Dr. Horacio Sarmento, maibe la atende.Ola

Jornal Nacional