PN EJIJE KOMPAÑIA SERVISU IHA HOSPITAL HO RESPONSABILIDADE

Membru Parlamentu Nasional (PN) ejije ba Kompañia sira hotu ne’ebe mak servisu limpeza iha Hospitais hotu tenke servisu ho responsabilidade tomak para bele kria kondisaun diak iha hospital sira.

“Foin dadauk ami ba Hospital Referal Baucau ema koalia iha ne’eba, Hau fo ezemplu ida iha “lavandaria” fatin fase ropa foer pasiente sira nian ne’e ema fase ho liman deit, tanba makina fase ropa nian laiha, e ema sira be servisu iha limpeza nian ne’e sira suspira katak, lolos ne’e Kompañia sira tenke fasilita makina para bele fase ropa. Nune’e mos ekipamentus ba limpeza sira ne’e manual, Hau hanoin Kompañia sira ne’e manan tender iha obrigasaun atu kumpri kondisoens ne’ebe atu oferese iha ne’eba,”prezidente komisaun F parlamentu nasional ne’ebe trata ba asunto Edukasaun, Saude, Veteranus, Igualdade Generu, deputadu Virgilio da Costa Hornai ba JN-Diario Sesta (3/7) semana kotuk ne’e iha PN.

Nia dehan, lolos ne’e emprezas ne’ebe halao servisu iha kada hospitais tenke hatudu responsabilidade servisu, labele buka deit mak lukru.

Deputadu bankada PD ne’e hatutan, Kompañia Timor-oan ne’ebe mak manan tender tenke halao servisu ho responsabilidade tenke halo kontrolu ida ba sira nia servisu.

“As-vezes ema dehan sira iha ne’eba ne’e falta aimoruk limpeza nian, e as-ves hospital bot mas sira la hola ekipamentus moderna nian para atu ba halo limpeza, maibe halo servisu manuais deit, halo ema sira ne’ebe que servisu iha ne’eba mos ladun komportavel para atu fornese servisu,”hateten deputadu Virgilio.

Nune’e mos membru komisaun F, deputada Domingas Alves da Silva “ Bilou-Mali” hatutan, problema ne’ebe refere persiza hadia iha kada hospitais para bele iha kondisaun diak.

Maske nune’e nia dehan sistema de atendimentu iha hospitais labele kria diskriminasaun, maibe tenke atendimentu ba populasau bai-bain ho ema bot tenke hanesan.

“Maluk sira ne’ebe mak moras iha hospital tenke atende duni e tenke hadia sistema de atendimentu, atendimentu tenke ba ema hotu-hotu hanesan, labele ba ema bot oin seluk no atendimentu ba povu kik ne’ebe tama iha hospital atende oin seluk,”afirma deputada Bilou Mali.bal

Jornal Nacional