XANANA GUSMÃO IHA HANOIN REZIGNA-AN, PM RUI SEIDAUK HATENE

Eis Primeiru Ministru (PM), Kay Rala Xanana Gusmão iha hanoin atu rezigna-an husi VI Governu ida ne’e, ho razaun kole.

Informasaun ne’e, komesa espalla ona iha komunidade nia le’et hodi halo komunidade sira hafodak ho estratejia polítika Xanana Gusmão nian ne’e.

Maske Xanana Gusmão nia rezignasuan ne’e seidauk klaru, maibé dadauk ne’e, membru Governu balu komesa preokupa ho isu ida ne’e, no husu ba Xanana Gusmão atu akompaña nafatin VI Governu ida ne’e to’o remata.

La’os membru Governu sira de’it mak preokupa ho isu rezignasaun Xanana nia ne’e, maibé públiku li-liu militantes partidu CNRT sira komesa konfuzaun ho polítika lider rezistensia Xanana Gusmão nian ne’e.

“Katuas Xanana dehan atu rezigna an, no isu ida ne’e agora tren tebes iha komunidade,”informa fonte ida ne’ebé lakohi públika sai nia naran ba públiku,”

Nia hatutan, tuir informasaun ne’ebé nia hatene katak, Xanana la’os atu ses husi Governu, maibé Xanana hakarak Cuti tinan 2 hodi deskansa, tanba durante periodu 2 lidera Governu, Xanana Gusmão kole los ona.

“Katuas Xanana dehan nia kole, nia hakarak cuti tinan 2 para deskansa uit oan iha uma, maibé nia sei akompaña nafatin Governu ida ne’e,”relata fontes ne’e.

Tuir informasaun katak, Xanana Gusmão hatama ona ninia karta rezignasaun ba Primeiru Ministru Rui Araújo, no Xanana Gusmão mós informa ona nia rezignasaun ne’e ba Prezidente da Repúblika Taur Matan Ruak.

Bainhira jornalista sira koko atu komfirma ho Primeiru Ministru Rui Maria de Araújo, maibé Xefi Governu ne’e rezeita informasaun refere.

“Ha’u hanesan Xefi Governu, seidauk hatene, ita bo’ot sira hatene tiha ona ne’e,”resposta PM Rui Araújo,iha Aeroportu Internasionál Nicolau Lobato Comoro Dili, Tersa (22/9), bainhira jornalista sira husu kona-ba Xanana hatama ona karta Rezignasaun.cos

Jornal Nacional