GOVERNU HAHÚ DISKUTI NARAN ESTRADA IHA DILI

Governu liu husi Konsellu Ministru (KM) hahú deskuti naran ba estrada iha sidade Dili.

Sekretáriu Estadu Konsellu Ministrus, Avelino Coelho informa katak, diksuaun dahuluk iha Konsellu Ministru ne’e, diskuti kona-ba kuadrus Organizasaun Nasoens Unidas (ONU) ba asistensia dezenvolvimentu dokumentus, no programa planu asaun ba Timor-Leste nian.

Kuadrus hirak ne’e, ko’alia liu ba parseiru dezenvolvimentu sira hanesan, UNICEF UNDP inklui UNFPA, no hetan ona aprovasaun husi KM, atu nune’e MNEK bele haree oinsa maka atu halo servisu sira ne’e, li-liu ba selebrasaun de akordus.

“Ministru Adminstrasaun Estatal aprezenta ona lista kona-ba atu tau naran ba estrada sira iha Dili laran tomak, maibé sei adiadu, sei ba halo preparasaun di’ak liu tan mak foin aprezenta fali,”informa Avelino Coelho ba jornalista sira, iha Palásiu Governu, Tersa (21/9).

Nia hatutan, estrada Dili laran ne’e, Ministériu Administrasaun Estatal aprezenta naran husi eis titulares sira inklui heroi sira, nune’e bele tau ba estrada iha kapital Dili.

Maibé Avelino Coelho dehan, nia seidauk bele fó sai naran ne’ebé sei tau ba estrada sira ne’e, tanba proposta ne’e seidauk hetan parovasaun hosi Konsellu Ministru.

Avelino esklarese, iha sorumutu konsellu ministrus ne’e mós, konsege hasai rejolusaun ida, hodi aprova rejimentu komisaun inter-ministerial seguransa.

Rejimentu ne’e, aprezenta husi Primeiru Ministru, Rui Maria de Araújo, no hetan ona aprovasaun husi membru ezekutivu sira.

Nune’e mós aprova rejolusaun ida hodi nomeia membru diresaun ba Arkivu Muzeum Rejistensia nian, hodi define konsellu administrasaun iha muzeum.

Iha okaziaun ne’e mós, Ministériu Finansas (MF) aprezenta programa dezenvolvimentu sustentável ba Konsellu Ministru, no hetan ona aprovasaun.

Ministériu Finansas mós aprezenta ona planu ba reforma fiskál ne’ebé lidera husi Komisaria Fernanda Borges, hetan ona aprovasaun.

Entretantu, Ministériu Saúde mós aprezenta lei kona-ba Tabaku, maibé seidauk aprova, tanba presiza halo preparasaun ne’ebé klean. Konsellu Ministru mós aprova ona estatutu ba Hospital Nasionál Guido Valadares (HNGV), nune’e sai hanesan baze ba legál ba futuru.cos

Jornal Nacional