EKONOMIA POVU LAIHA MUDANSA

Direktur exekutivu NGO Luta Hamutuk, Mericio “Akara” deklatra katak, laiha mudansa ba ekonomia povu Timor Leste nian, tanba maioria povu sei kontinua moris iha kiak nia laran.

“Ita hare deit iha area Becora nian iha ema balun ke han sei dala ida iha loron ida ne’e dunik ekonomia povu nian ne’e sei susar no laiha mudansa,”hateten Mericio “Akara” ba JN-SEMANÁRIO, Kinta (05/11)ne’e iha ninia knar fatin Farol-Dili.

Tuir diretur Luta Hamutuk katak, ekonomia povu la lao ho diak, tanba seidauk iha kampu de trabalhu ba joven sira.

“Ho problema hirak ne’e persiza iha produsaun ou fabrika ruma atu nune sira bele servisu hodi hetan osan, atu nune bele hadia ekonomia familia nian,”akresenta Akara.

Maibe atu rezolve problema ne’ebe refere diretur Luta Hamutuk sujere Governu kria kampu de trabalhu ba jovens sira liu husi dalan loke industria ezemplu fabrika ikan lata ou buat ruma ne’ebe bele produs atu nune povu sira bele servisu iha ne’eba hodi sustenta ba moris.

“Governu bele bolu investedor husi rai liur atu nune bele loke fabrika ruma iha Timor ho nune bele hamosu kampu de trabalhu ba sira,”tenik nia.

Nia hatutan ekonomia povu ki’ik nian mak seidauk iha mudansa, maibe membru Governu, inklui funsionariu sira ekonomia avansadu ona no bele sosa tan kareta rua ou tolu e sira mos bele ba pasiar iha rai liur ba mai.

“Ne’e duni Ha’u nia mensajen ba povu ki’ik sira atu ejije nafatin sira nia direitu ba Governu hodi fasilita ou kria kampu de trabalhu ba joven no povu ki’ik sira, no fasilita transporte ou estrada ba sira hodi mai fan sira nia produtu,”haklaken Akara. Ita/LJ1

Jornal Nacional