PM Rui: Eventu Tinan 500 Hanesan Kememorasaun Loron Kolonializmu Ne’e Sala

Relasiona ho preukupasoes balun ne’ebé hato’o hosi sosiedade sivíl balun katak komemorasaun tinan 500 evanjelizasaun tama mai Timor-Leste (Lifau) hanesan estadu atu komemora fali loron kolonializmu nian, Primeiru Ministru Dr. Rui Maria de Araújo konsidera katak ne’e sala.

Primeiru Minístu Rui Maria de Araújo hatuan, nia laiha komentáriu ba asuntu ne’e tanba hanoin ne’e sala. “Hau laiha komentáriu kona-ba ida ne’e tanba ne’e sala,” dehan Rui hafoin ramata inkontru ho Xefi Estadu Taur Matan Ruak iha Palásiu Prezidensiál, Bairu-Pité, Díli, Sesta (20/11/2015).

Nia esplika, hanesan ita hotu rona hosi ita nia líder sira no mós fundadores nasaun nian ne’ebé ko’alia katak selebrasaun ida ne’e atu selebra sivilizasaun (budaya) rua hasoru malu hodi hamosu identidade foun ba Timor-Leste (TL).

“Sivilizasaun Portugés ho Timor hasoru malu iha tinan 500 liu-ba, no liu-hosi hasoru malu ida ne’e maka hamosu identidade foun ba ita nu’udar povu no nasaun. Ida ne’e maka ita selebra. Ita la’os selebra chegada do kolonializmu nian,” Xefi Guvernu haktuir.

Aleinde ne’e, iha biban hasoru malu entre reprezentante órgaun soberania rua ne’e, ko’alia mós kona-ba preparasaun ba komemorasaun ne’e rasik. Rui hateten, preparasaun iha Zona Espesiál Oe-Cusse ne’e la’o di’ak.

“Hato’o mós ba señor Prezidente kona-ba preparasaun selebrasaun tinan 500 inkontru sivilizasaun rua (2) Igreja ho Timor-Leste. Oras ne’e daudaun hala’o tiha ona feira iha ne’ebá no sira halo preparasaun di’ak,” nia dehan.

Kona-ba infraestrutura sira ne’ebé hala’o, nia esplika katak, iha ne’ebá (Oe-Cusse) la’os de’it atu selebra tinan 500 nian maibé infraestrutura sira ne’e iha kontestu implementasaun Zona Espesiál de Merkadu nian.

“Sira ne’ebé espesífiku atu selebra tinan 500 ne’e maka monumentu Lifau ninian ho tan Jadin ida iha Pante Makassar nian. Ne’e maka infraestrutura ne’ebé atu halo hodi selebra. Laiha razaun para hatete dehan infraestrutura seidauk prontu,” Rui afirma. (Jon)

Matadalan