MCIA KONTINUA PROGRAMA POVU KUDA GOVERNU SOSA

Maske Povu Kuda Governu Sosa nudar programa IV Governu Konstitusional nian, maibe Ministeriu Comerçio, Industria no Ambiente (MCIA) sei tau prioridade hodi kontinua programa ne’e.

Ministru MCIA, Costancio Pinto hateten, MCIA nafatin ho nia politika atu kontinua programa Povu Kuda Govenru Sosa, tan ne’e MCIA sei kopera no servisu hamutuk fali ho Ministeriu Agrikultura e Pescas (MAP) atu nune’e bele hare produtus ne’ebe mak merese Governu atu sosa duni.

‘’Iha tempu badak mak ami foin deside atu sosa produtu ne’e hira, exemplu sosa hare karik toneladas hira, batar karik toneladas hira, nune’e agrikultor sira mos bele konsentra iha sira nia produsaun ne’ebe mak Governu sei sosa ho toneladas hira,’’ dehan Ministru Costancio Pinto, ba jornalista sira iha Aileu vila, Munispiu Aileu, Sesta (08/01/2016).

Costancio hatete, agora Governu sei esforsu liu husi MCIA sosa hela hare kulit, batar no seluk tan, hodi halo fali pilajen distribuisaun ba fali iha merkadu, maibe nia presu la hanesan ho fos ne’ebe mak importa mai husi rai liur.

Nia mos esklarese katak, tinan-tinan Governu sempre tau osan hodi importa fos husi rai luir, maibe iha parte seluk Governu mos liu husi MCIA esforsu hela hasae produsaun rai laran nune’e bele hamenus importasaun fos husi rai liur.

‘’Importante mak ita nia agrikultor sira tenki servisu makas hodi produs aihan ne’ebe mak ho kualidade, nune’e Governu nafatin sosa produsaun rai laran depois kontinua distribui ba merkadu, maibe agora ami sei kualia lai ho MAP hodi identifika produsaun sira ne’ebe mak diak liu, tanba durante ne’e MAP mak hatene klean liu no iha kunesementu kona ba produsaun ne’ebe mak diak,’’ afirma Ministru Costancio Pinto. nia

Jornal Nacional