TULA FOER IHA DILI, SMD KONTRATA TRUK 40

Saneamentu Munisipiu Dili (SMD), kontrata ona truk 40 hodi responsabiliza tula foer iha Dili laran ba soe iha fatin lixu Tibar.

Iha Dezembru 2015. SMD loke konkursu ba publiku hodi husu ba kareta baskolante sira atu bele hatama dokumentus para konkore ba kontratu tula foer iha Dili laran. Nune’e, iha baskolante 139 maka hatama dokumenus, maibe iha faze final nian kareta 40 deit maka aprovadu tanba kondisaun diak no dokumentus kompletu.

“Prosesu ba kareta baskulante 40 ne’e hahú no hala’o tiha ona, no kareta nain 40 ne’e mos ami halo tiha enkontru iha loron 30 Dezembru , atu nune’e iha loron 2 Janeiru 2016, hahú apoiu servisu raut foer iha Dili laran, informa Xefi Departementu SMD, Domingos dos Santos Soriano ba JNDiario iha knar fatin, Matadoru, Dili, Sesta (8/1/2016).Nia hatutan kareta baskulante 40 ne’e oras ne’e dadauk hala’o ona sira nia servisu apoiu ba Saneamentu Munisipiu Dili hodi limpeza raut fo’er iha kapital Dili laran, no agora ne’e sira nia servisu tama ona semana ida.

Nia informa tan katak kareta hirak ne’e sira koloka ba area 40 iha Dili laran, iha area balun maka sira koloka kareta saneamentu 2 hodi halo serbisu limpeza raut foer iha sidade laran, area ne’be koloka kareta saneamentu 2 hodi halo servisu maka hanesan area Terminal Becora to’o Kuluhun no Merkadu Taibesi inklui mo’os Komoro ho razaun tanba area hirak ne’e produz foer barak.

“Kareta 40 ne’e ami fahe ba area 40 iha Dili laran por ezemplu; Bidau Santana to’o Cristo Rei mai Bidau Masaur ami tau kareta 1, husi kruzamentu Kuluhun to’o Terminal Becora pois Sabraka laran, komarka ne’e ami tau kareta 2, ba fali Merkadu Taibesi ne’eba ita nia vendedores barak produz mo’os foer barak tanba ne’e iha ne’eba mos ami tau kareta 2, mo’os area sira seluk mos hanesan ami tau kareta ida ida iha ne’eba só uniku suku komoro maka tau kareta 8 iha ne’eba tanba nia iha area bo’ot, sira seluk ami tau suku 1 kareta 1” Domingos hateten.

Nia dehan, orariu serbisu nian sira hahú iha tuku 6:30 dadersan, kareta idak idak ho nia pessoal ba apel iha ne’eba depois maka nia derigi sira ba area ne’ebe maka nia determina tiha ona katak nia koalia hotu konaba lala’ok raut foer depois maka sira foin sai ba foti foer hodi ba soe iha Tibar hahú husi dader to’o lokraik kada loron 1 sira halo ret 3.

Kareta 40 ne’e hetan kontratu husi Administrasaun Munisipiu Dili husi MAE nia okos, orsamentu refere husi Ministeriu maka oferese bazeia ba orsamentu Estadu tinan 2015 nian ne’ebe ho montante US$ 950.000.

Nia husu ba komunidade ne’ebe hela iha kapital Dili tenke iha konsiderasaun no konsnesua atu bele soe foer iha nia fatin no tuir orariu. Lj2

Jornal Nacional