HEMU AIMORUK TENKE IHA RESEITA DOUTOR

Doutor Julião Alberto da Silva husu ba pasiente sira atu hemu aimoruk ruma tenke ho reseita doutor nune’e bele prevene overdosis.

Doutor Julião da Silva fo sai lia hirak ne’e, relasiona ho ema barak mak hemu aimoruk maibe laiha reseita husi doutor bainhira moras.

Tuir nia, durante ne’e komunidade barak bainhira moras sira ba sosa aimoruk iha klinika sira, liu- liu klinika privadu sira maibe laiha reseita husi doutor bele fo perigu ba saude.

“Ita nia komunidade sira barak mak bainhira moras sira la ba fasilidade saude hodi koko sira nia moras mak foin simu aimoruk husi doutor maibe moras hanesan malaria ka moras ispa, Diare no moras seluk tan sira ba sosa deit aimoruk iha klinika ka kios sira ne’ebe besik lori ba uma sira hemu sein reseita husi doutor entaun ida ne’e afeita ba pupolasaun sira nia saude liu-liu konaba rezistensia” Doutor Julião Alberto da silva Ba JN-Diario iha Comoro Dili Sabado (9/1/2016)

Tamba ne’e doutor Julião hatete, atu prevene ida ne’e Ministriu Saude tenke kontrola fo regulamentu aimoruk ba klinika privadu sira ka iha kios sira ne’ebe faan aimoruk para sira la bele fa’an aimoruk sein reseita doutor hanesan antibiotik, no tablet anti malaria ne’ebe fa’an iha klinika privadu sira ba komunidade sira.

Entetantu estudante Enfermajen Instituto Siencia Saude Grasa de Deus, Filomena da Costa Ramos hatete, durante ne’e ema sira ne’ebe moras hanesan Malaria , dengue, ispa no moras seluk tan sira lakohi ba fasilidade saude simu aimoruk maibe sira ba sosa deit aimoruk iha klinika ou kios sira ne’ebe besik, ida ne’e bele fo perigu ba sira rasik.

“Komunidade sira iha dili laran bainhira ha’u haree sira nia oan, familia moras isin manas loron rua ka tolu, ou mear ruma sira lakohi ba fasilidade saude para koko sira nia moras mak foin doutor fo reseita maibe sira ba fali sosa iha klinika ou kios sira ne’ebé laiha reseita husi doutor ida ne’e perigu,”dehan nia. car

Jornal Nacional