KARKETU DEROTA HASORU PORTO TAIBESSI 1-2

Primeira divizaun kampionatu Liga Futebol Amadora (jornada 3), Karketu Dili FC derota hasoru Porto Taibessi, liu husi jogu kontra atake ne’ebé mak hala’o iha Estadium Munisipal Dili, Sabadu (19/03/2016)

Hahu jogu primeira parte, jogadore ekipa Portu Taibessi FC hatudu sira nia ambisaun másimu atu hetan pontus tolu.

Tanba ne’e mak, hahu árbitu primeira parte lian, jogadores ekipa Porto ne’ebé lidera no organiza husi kapitaun Eusebio Almeida nomos Armindo Almeida iha kampu klaran hatudu duni jogu furak no atraitifu liu husi tatiku atake ne’ebé mak jogador hirak ne’e halo ba area perigu Karketu Dili FC, ne’ebé mak lahetan guarda másimu husi defeza estranjeiru Abdul Rahman ne’ebé maka labele joga tanba hetan aleiz.

Karketu Dili FC, bele hetan golu iha menutu 28 maibe bola pasa ne’ebé mak lansa husi Titos Bonai lakonsege funsiona másimu husi nia kompatriota Patrick Wanggai hafoin bola sutu ne’ebé maka nia lansa konsege salva husi baliza Fagio Pereira.

Tama ba menutu 35, avansadu Marcelino husi Porto Taibessi FC, hetan mos oportunidade diak atu halo golu maibe suta ne’ebé mak lansa husi Melhor markador iha fase apuramentu ne’e konsege hetan salva husi Frangenio Tou, ne’ebé tenki esforsu maka’as hodi salva nia baliza.

Enkuantu score 0-0 ba ekipa rua lamuda to intervallu primeira parte no kontinua fali ba jogu segunda parte Porto Taibessi FC hasa’e liu tempu jogu nian hodi hala’o atake.

Esforsu hirak ne’e hetan tebes rezultadu diak hafoin iha menutu 56, Porto Taibessi hetan prezenti pinalidade husi arbitro senior Zelazio da Silva hafoin defeza Karketu Dili, Tedoru hamonu avansadu Marcelino iha grande area laran.

Anggiso Barbosa ne’ebé hetan oportunidade hanesan markador, konsege realiza nia fungsaun ho diak hafoin bola ne’ebé maka nia suta tama iha parte liman karuk Frangenio Tou ne’ebé maka labele halo buat barak hodi hateke tuir bola tama iha nia redi parte liman karuk.

Karketu Dili FC, ne’ebé iha lokoraik ne’e ladun hatudu sira nia jogu furak hanesan jogu rua liu ba, konsege hamenus golu iha menutu 64 liu husi kapitaun ekipa Nikolao Fernades, hafoin aproveita pinalidade ne’ebé mak halo husi defeza Julio da Silva hodi hamonu Titos Bonai iha grande area laran.

Jogador ho númeru kamizola 21 ne’e konsege marka bola ho diak ba baliza Fagio Pereira ne’ebé hateke tuir deit wainhira bola tama iha parte liman los nia redi.

Koordenasaun linña defeza ekipa Karketu Dili FC, ne’ebé mak la’o ladun diak hetan aproveita husi jogador Porto Taibesse FC sira hafoin iha menutu 82 avansadu Miguel Barbosa konsege aumenta tan golu liu husi bola passa ne’ebé maka lansa husi Marcelino, tanba defeza Karket Dili FC, ne’ebé ladun iha koordenasaun diak hateke tuir deit bola suta ne’ebé mak husi jogador ho númeru kamizola 90 ne’e.

Golu ida ne’e mos hanesan golu badala ikus ba klube rua refere tanba lamuda, posisaun Porto Taibesse FC, ne’ebé okupa nafatin posisaun 8 ka taka odamatan ho pontus 3 iha divisaun ida ne’e. Ito

Jornal Nacional