TIMOR-LESTE LA HUSU AUSTRALIA NIA KARIDADE

DILI - Líder opozisaun hosi partidu Trabalista Austrália nian rekoñese hasoru malu ho Xanana Gusmão, la husu kona-ba karidade governu Austrália nian ba Timor Leste, maibé husu liuliu mak justisa ba fronteira marítima.

“Bainhira ha’u hasoru Xanana Gusmão iha Marsu 2015, nia la husu kona-ba karidade ba Timor Leste maibé nia husu mak justisa,” subliña Vise Líder Opozisaun, Tanya Plibersek, liuhosi nia mensajen solidaridade ba asaun solidaridade internasional ba disputa fronteira marítima entre Timor Leste ho Austrália ne’ebé Timor Post assesu, Segunda (22/03).

Tanya rekoñese, disputa fronteira marítima hanesan veneno sei halanu relasaun iha nasaun viziñu rua ne’e. Tanba ne’e, nia subliña, Partidu Trabalista iha governu nia laran finalmente sei rejolve kona-ba fronteira ho Timor Leste liuhosi diskusaun no arbitrajen.

“Imi barak sai ona ativista iha tinan barak, la kole ko’alia barak kona-ba justisa Timor Leste. Hahú kedas bainhira Timor Leste hetan ninia independensia ami orgullu hanesan povu Australianu ne’ebé hola parte iha prosesu ida ne’e,” subliña Tanya iha karta mensajen solidariedade ne’e.

Nia hatutan, Partidu Trabalista laiha serteja ba fronteira marítima iha tinan 40 nia laran, espera katak rikusoin hosi tasi Timor sei dezenvolve di’ak hodi benefisia jerasaun futuru.

“Ida ne’e mak proposta hosi Trabalista nian. Ha’u sauda ba imi kontinua advokasia ho Timor Leste,” hatete Tanya ba solidariedade internasional ba asaun hosi povu Timor Leste. (cão)

Timor Post