FINALISTA UNTL REMATA ESTAJIU, HUSU MS SENSIBILIZA PROGRAMA PLANEAMENTU FAMILIAR NO SAUDE AMBIENTAL

Finalista Universidade Nasional Timor Lorosae (UNTL) husi Fakuldade siensia saude, departementu infermazen no parteira ne’ebe remata hala’o etajiu iha Munisipiu Manatuto, husu ba Minsiteriu da Saude (MS) atu kontinua halo sensibilijasaun ba komunidade konaba programa planeamanetu familiar no saude ambiental ba komunidade sira iha baze.

Tanba tuir dadus ne’ebe iha hatudu, komunidade barak seidauk hatene oinsa halo planeimentu familiar nune’e  familia uma kain balu iha oan barak inklui inan feton barak la ba partus iha Centru Saude ne’ebe mak Governu prepara, inklui  komunidade balu kontinua husik animal iha fat-fatin hodi hafoer ambiente.

“Iha ne’e problema barak ne’ebe mak ami konsege identifika liu-liu iha parte parteira nian ne’ebe mak MS presija fo atensaun  hodi kontinua halao sensibilijasaun mak konaba inan barak mak sei partus iha uma, segundu inan barak mak sidauk tuir planeiamentu familiar hodi halo oan barak, terseiru kona ba saude ambiental katak komunidade barak mak husik animal arbiru no komunidade barak mak sidauk iha sintina, inklui labarik ho idade eskola barak mak la uja sinelus no sapatu, inklui  konaba oinsa prevene moras hadaet,”hateten reprezentante estajiaria Angelica Jacinta Hornai Colo ba jornalista sira iha Munisipiu Manatuto segunda (20/6/2016) hafoin remata serimonia despedida estajiariu nian.

Ba problema ne’ebe maka estajiariu sira dentifika ne’e husu ba MS atu servisu hamutuk ho akademia UNTL fakuldade saude para bele kontinua sensibilija programa refere nune’e komunidade bele hatene  vantajen husi programa ne’e rasik.

“Problema sira ne’ebe mak ami identifika, nune’e ami husu ba MS atu bele servisu hamutuk ho ami nia akademika hodi fo informasaun klean liu tan  ba komunidade atu sira bele komprende importansia husi saude, nune’e karik sira partus bele mai fasilidade saude tanba, ema dehan katak saude ne’e iha ita nia liman rasik, entaun ho infomasaun ne’ebe ita fo sira bele komprende nune’e sira bele ba iha fasilidade saude kuando moras,”esplika nia.

Iha sorin seluk Irman Lusinda da  Conceição katak, husi estajiariu ne’e atu hatene klean konaba saida deit mak komunidade sira infrenta iha baze iha moris lor-loron nian.

“Durante fulan rua ne’e ami foti dadus iha suku Lifau Aldeia Uma Rentau, e husi dadus sira ne’e  diak, bazeia ba baut ne’ebe ami hetan mak iha prioridade rua mak presija rezolve hamutuk mak hanesan planeiamentu familair no saude ambiental ne’ebe presija hetan atensaun, ne’ebe mak la’os ami estudante deit mak atu rezolve, maibe ho autoridades ne’ebe mak kompetenti  mak hanesan parte saude, autoridades inklui komunidadade tanba ho  servisu hamutuk mak ita bele rezolve,”Irman Lusinda haktuir.

Agradese kooperasaun autoridade lokal no komunidade Manatuto

Estudantes  Finalista UNTL  hala’o estajiariu iha Munisipiu Manatuto remata tiha ona la’o ho diak durante fulan rua (Abril-Juño) tinan 2016 ne’e,  reitor UNTL, Francisco Miguel Martins, agradese ba kooperasaun autoridades lokais no komunidades sira. Agradesimentu ne’e reitor UNTL hato’o tanba, ho sira nia laran luak bele simu no fatin ba estudante finalista infermazen nomos parteira hala’o estajiariu iha fatin refere.

“Ita nia oan sira ne’ebe mai buka matenek  no aprende iha imi nia leet atu fila ona, nune’e agradese wain  teb-tebes em nome da universidade, em nome da instituisaun, inklui atutoridade no  komunidade tomak ne’ebe fo ona tempu no biban atu aprende iha imi nia le’et,”afirma reitor UNTL, Francisco Miguel  Martins.

Nia hatutan, estajiariu ne’e hala’o bebeik ona husi finalista UNTL  iha Munisipiu hotu-hotu iha area ne’ebe diferente hanesan ekonomia, sisensia sosiais, agrikultura, edukasaun, engeneria, direitu no seluk tan, entertantu ba infermazen no parteira foin mak halao primeira-ves iha Munisipiu Manatuto.

Reitor UNTL hatutan katak, estajiariu ne’e ho objetivu atu haree no hatene direitamente  proekupasaun komunidade sira nian entermos saude nian.

“Signifikadu estrajiariu ne’e atu aprende iha komunidade nia leet atu kompleta liu tan saida mak imi hetan ona iha universidade. , liu husi estajiariu fulan rua ida ne’e imi aprende buat barak, oinsa moris iha sosiedade nia leet, aprende moris iha difikuldade nia leet, moris iha limitasaun no  buat oi-oin nia laran,”esklarese reitor UNTL ne’e.

Tanba ne’e nia dehan, pratika nudar prosesu aprendijajen ida ne’ebe validu tanba, bele haree no senti rasik sa los mak mosu iha komunidade nia moris lor-loron nian.

“Ami eduka imi la’os ba ami nia an, maibe atu ba nasaun TL,  ne’ebe tuir prosesu formasaun labele halimar ,”reitor UNTL esklarese ba finalista UNTL.

Iha fatin hanesan reprezentante Admnistrador Munisipiu Manatuto, Agripino da Silva Sarmento ne’ebe  mos nudar sekertariu Administrador hatete, sente kontenti ho prezensa estudante finalista UNTL fakuldade siensia saude departementu enfermazen no parteira ne’ebe durante  estajiu halao pratika ho diak ho partes hotu-hotu hanesan.

“Ha’u sente kontete teb-tebes tanba, estajiariu sira bele mai hamutuk ho ami hodi haree direitamente saida mak komunidade sira infrenta. Tanba ita hatene katak povu ne’e nia moris oi-oin nune’e sira bele mai sente rasik sofrementu saida mak komunidade Manatuto infrenta nune’e sira bele ba hato’o parte ne’ebe kompetenti saida deit mak sira haree  direitamente iha komunidade nia leet,”haklaken rreprezentante administrador Manatuto ne’e. Iha sorin seluk Angelica Jacinta Hornai Colo, nudar estajiariu husi departementu parteira hatutan katak, husi estajiariu ne’e bele tun direitamente ba iha komunidade sira nia leet hodi bele hatene no sente rasik  difikuldade saida mak sira infrenta.

Husi estajiariu ne’e estudantes finalista identika problema konaba inan barak iha Munisipio refere mak lakohi ba partus iha  postu saude no inan barak mak latuir planeamentu familiar no seluk tan inklui problema saude ambiental.

“Ida ne’e ami identifika liu husi ami nia sosialijasaun ne’ebe ami servisu hamutuk ho pesoal saude sira liu husi programa SISKA ne’ebe husi programa ida ne’e ami bele hatene katak ida ne’e amk problema baziku ne’ebe ami parteiras sira infrenta,”esplika nia.

Total estudante ne’ebe hala’o estajiu iha Munisipiu Manatuto hamutuk na’in 112, husi numeru ne’e na’in 61 husi infermazen, nain 51 husi parteira. Tantu fatin ne’ebe estajiairu sira ba hala’o estajiu mak hanesan, postu saude Manatuto vila, Laleia no Laklo.

Partisipa iha serimonia despedida ne’e kompostu husi, reitor UNTL, Francisco Miguel Martins, pro-reitor asuntus finansas, Dekanu saude, inklui autoridades lokais Munisipiu manatuto, dosentes no estudantes inklui komunidades balun.ola

Jornal Nacional