Governu Standariza Pasaporte TL Ba Elektroniku

Governu Timor-Leste liu husi Ministerio Justisa hahu estandariza (internasional) pasaporte tuan ba elektroniku, ho objetivu atu garantia seguransa ba utilizador sira bainhira halo viajen ba estranjeirus.

Diretor Nasional Registo do Notariado Victor da Costa Neto, hateten inisiativa halo mudansas ba passaporte ne’e bazea ba ejizensia utilizador sira, e dala barak sira komplein tanba passaporte Timor nian labele detekta iha makina iha aero portu internasional sira.

“Ita nia passaporte agora dadaun ne’e ninia leitura sei fraku e la detekta ho makina sira iha kampo aviasaun internasional sira,” Diretor Neto hateten, iha Dili.

Ejizensia seluk mak, nia hateten, Aviasaun Telekomunikasaun Internasional husu atu passaporte hotu-hotu tenke tama iha sistema icon no passaporte sira ne’ebe mak atu tama iha icon tenke digitalizadu.

“Timor nian seidauk bele, tenke muda ba elektronika mak foin bele tama,” nia dehan.

Tanba ne’e, nia hateten, agora dadaun governu hahu halo kontratu ho kompania Gemalto husi Singapur ne’ebe konsege manan iha prosesu tenderizasaun.

“Agora kompania hahu servisu ona e iha 2017 ita bele uza ona pasaporte elektorniku ne’e,” nia hateten.

Iha parte seluk Membru Parlamentu Paul Moniz, konkorda ho pasaporte elektroniku ne’e, tanba realidade hatudu passaporte Timor nian agora ne’e labele detekta iha makina iha aero portu internasional sira hanesan iha Europeia.

“Ami iha esperiensia barak, wainhira ami sai ba estranjeirus, ita nia pasaporte seidauk bele detekta iha makina internasional sira,” nia dehan.

Tanba ne’e nia mos husu ba governu atu nafatin kontrolu (masimu) ba kompania ne’ebe halo passaporte ne’e, nune’e bele produs pasaporte ne’ebe ho kualidade, tanba ne’e osan povu nian.

“Ita tenke fakar osan ba buat ne’ebe kualidade,”nia dehan.

The Dili Weekly