S.L.BENFICA VS KARKETU DILI 0-0

Kontinuasaun jogu primeiru divizaun kampionatu Liga Futebol Amadora (LFA) Timor Leste Jornada-12, ekipa Sporting Laulara Benfica (SLB) verrsus (Vs) Karketu Dili FC, ne’ebé mak hala’o iha Estadíu Munisipal Dili, Domingo (10/07/2017), ho rezultadu empata 0-0.

Ho rezultadu jogu ne’e, ekipa rua refere tenke fahe pontus ida-ida ba malu, SLB hodi aumenta sira nia pontus antes ne’e pontus 18 ba pontus 19 husi jogu 12 ne’ebé sira halo, bo ekipa Karketu Dili FC foti pontus 1 hodi aumenta sira nia pontus antes ne’e iha pontus 14 ba pontus 15, husi jogu 12.

Hafoin remata kontra no atake entre ekipa rua refere, Manager husi klubu SLB, Domingos dos Santos Caero hateten, jogu kontra ekipa Karketu Dili ne’e hatudu nia rezultadu empata, maibe fiar-án nafatin, atu sai hanesan kampiaun ba Primeira Liga iha Timor-Leste.

“Jogu ne’e karik ami konsege kolekta pontus tolu,.! Ne’e fiar katak ami nia ekipa loke dalan forte tebes ona atu sai hanesan kampiaun iha Primeira Liga ne’e. Tanba SLB mai ho ambisaun ida forte katak sei manan ba jogu ne’e, maibe situasaun iha terenu oin seluk e jogu tenke remata ho rezultadu empata,”informa Caero.

Caero informa liu tan katak, rezultadu jogu ne’e akontese tanba falla husi arbitu, i antes ne’e dirijenti klubu hato’o ona protesta ba LFA atu labele autoriza arbitru ne’ebe mak sira haree katak labele lidera jogu ne’e, maibe diresaun kompetisaun nomos arbitrajen, garante katak sekarik situasaun la’o tuir sira nia preokupasaun mak sei hapara jogu.

“Antes de ami jouga, ami iha situasaun ne’ebé fo imfluensia mos ba mentalidade jogador sira ne’ebé mos preokupa husi parte arbitrajen. Ida ne’e ita hotu bele haree husi situasaun iha kampu laran ne’ebé ami haree katak ami konsege hetan oportunidade rua ba penalidade, maibe arbitru husik deit. alende ne’e iha mos falta barak mak konsege akontese mai ami maibe nafatin laiha desijaun ruma husi arbitu,” komenta Caero ho tristi.

Relasiona ho fallansu husi parte komisaun LFA liu-liu diresaun arbitu, Caero hateten, espera iha jogu rua ikus mai LFA tenke haree ba situasaun ne’e, tanba klubu ne’ebe mak partisipa iha ne’e alende investe talentu jogador sira, investe mos osan ne’ebe laos ho montante kiík. Ne’e duni ejije atu orgaun LFA bele haree asuntu hirak ne’e hodi nuneé bele dezenvolve futebol iha rai ne’e ho diak iha futuru.

Efrem Geronimo nudar jogador no kapitaun ekipa informa katak, husi parte jogadores sente hatudu ona esforsu masimu ba jogu kontra ekipa Karketu Dili FC ne’e, maibe rezultadu ak nune’e ona.

“Ami nia esforsu masimu mak ne’e, iha oportunidade para bele marka ka produs golu, maibe lakonsege funsiona ho masimu, tanba ne’e ami sei perpara-an diak liutan ba jogu rua ikus mai no optimista nafatin atu sai kampiaun,”hateten Nia.

Nune’e mos, iha tempu no fatin ne’ebé mak hanesan, treinador ekipa Karketu Dili FC, Antonio Timothio hateten, sir ania ekipa kontente ho rezultadu jogu empata, husi esforsu ne’ebe mak hatudu husi jogadores tomak.

“Ha’u sente kontente no fo orgulho nafatin ba ha’u nia jogador sira nia esforsu-an ba jogu ne’e tanba konsege empata kontra ekipa hanesan SLB mak oras ne’e provizoriamente lidera hela klasifikasaun tabela pontus, tanba ne’e ha’u bele dehan sorte ba ami mak seidauk hola parte tanba ami hetan oportunidade barak atu produs golu maibe lakonsege aproveita ho diak husi ha’u nia jogador sira,”dehan nia.

Maske nune’e, Vicente Ramos, nudar jogador no kapitaun ekipa sente triste tebes ho rezultadu jogu empata ne’e.

“Ami iha oportunidade barak atu marka golu, maibe la konsege finaliza ho diak husi ha’u nia jogador sira, tanba ne’e ami sei kontinua hakas-an nafatin atu hasoru jogu rua ikus mai ho masimu liu tan.” dehan Nia.Ito

Jornal Nacional