LU-OLO: LABELE HALAKON IDENTIDADE FETO TIMOR

Prezidente partidu FRETILIN, Francisco Guterres “Lu-Olo” enkoraza Organizasaun Popular Mulher Timor (OPMT) atu esforsu hodi haburas nafatin identidade feto Timor hotu, tanba feto parseiru importante iha dezenvolvimentu Nasaun nian.

Tanba ne’e persiza teb-tebes organizasaun feto FRETILIN OPMT transmiti valores no prinsipiu organizasaun OPMT ninian ba jerasaun foun feto Timor sira hodi labele halakon identidade feto Timor nian.

“OPMT organizasaun feto ninian ne’ebe moris hori-nanis kedas wainhira FRETILIN husu Independensia ukun rasik an ba rai ida ne’e. OPMT organizasaun feto nian uniku ne’ebe iha tempu ne’eba mak reprezenta feto hotu-hotu, hodi reprezenta mos direitu feto ninian ba Timor Leste ninia Independensia no ninia liberdade tomak. E Timor Leste ohin loron ita nia oan sira moris iha situasaun oinseluk, sira nia presepsaun mundo nian la’o oin seluk, la hanesan ho ita. Ne’e duni persiza nafatin ita hanorin sira para hakat ho valores, hakat ho identidade hanesan feto Timor ninian,”afirma prezidente partidu FRETILIN, Francisco Guterres “Lu-Olo” hateten iha abertura programa jantar kultural ne’ebe organiza husi OPMT-FRETILIN iha Delta Nova,  Domingo (03/07/2016) kalan.

Iha tempu luta Lu-Olo hateten, OPMT nudar organizasaun feto uniku ne’ebe reprezenta feto Timor hotu ba Timor Leste ninia independensia no ninia liberdade tomak.

Iha tempu luta ba libertasaun Independensia TL nian organizasaun OPMT hamutuk ho mane maluk sira hodi luta ba ukun rasik an, maske feto barak iha momentu ne’eba moris iha situasaun terus no susar nia laran.

“Timor Leste senti orgulho bo’ot teb-tebes, la’os deit FRETILIN, maibe povu tomak no ba  feto tomak ne’ebe halibur an iha organizasaun OPMT para atu defende independensia ida ne’e to’o ohin loron. Tanba ne’e mak ha’u dehan OPMT ho FRETILIN iha ninia istoria rasik,”esklarese Lu-Olo.

Iha biban ne’e prezidente partidu FRETILIN dezafia organizasaun OPMT atu organiza an diak liu tan hodi hakat nafatin ba oin ho konferensia OMPT ne’ebe sei hala’o iha fulan Agusto tinan 2016 nia laran.

Entretantu iha fatin hanesan Sekertariu Jeral OPMT, Merita Alves hateten katak, eventu jantar kultural ne’e parte husi preparasaun ba konferensia OMP ne’ebe mak sei hala’o iha fulan Agusto tinan 2016 ne’e nia laran.

“Jantar kultural ida ne’e nudar preparasaun atu hasoru konferensia OPMT n’ebe sei hala’o iha fulan Agusto tinan ne’e nia laran,”haktuir Merita Alves.

Iha oportunidade ne’e SekJer OPMT-FRETILIN hateten, sira sei esforsu nafatin hodi lori organizasaun ne’e ba oin, maske sei hasoru tentativu no dezafius oi-oin, maibe sei esforsu hodi sai matadalan ba jerasaun foun feto sira hodi la’o ba oin liu husi dezenvolve organizasaun OPMT.

Iha biban ne’e sekertariu jeral OPMT, Merita Alves agradese no apresia teb-tebes ba lideransa partidu FRETILIN hotu, konvidadus no korpu diplomatiku sira ninia prezensa.

Serimonia jantar kultural ne’e partisipa husi, prezidente partidu FRETILIN Francisco Guterres “Lu-Olo” ho espouza, Sekretariu Jeral (SekJer) Mari Alkatiri ho espouza, inklui konvidadus no korpu diplomatiku sira.

Eventu jantar kultural ne’e hala’o mos leilaun ba aifunan, aifuan, kadeira rota, kuadrus. Tantu liu husi jantar kultural ne’e aprezenta hahan kultural no mos dansa kultural nian.bal

Jornal Nacional