PM Reinu Kamboja Vizita TL

DILI, (ANTIL) – Primeiru Ministru Reinu Kambodia, Samdech Akka Moha Sena Padei Techo Hun Sen sei vizita Timor-Leste durante loron rua, Sesta, (19/8) to’o Sabadu, (20/8) hodi hametin relasaun bilaterál.

Durante vizita, tuir informasaun hosi Konsellu Ministru ne’ebé ANTIL rekolla hatete, vizita ne’e sei aprova no asina akordu rua no nota entendimentu ida.

Akordu sira ne’e regula kooperasaun ekonómika no tékniku, nune’e mós ko’alia kona-ba vistu livre ba titulár pasaporte diplomátiku sira no servisu nian.

Memorandu ne’e foka liu-ba kooperasaun iha área serbisu nian hanesan, troka informasaun iha área oin-oin no interkámbiu pesoál espesialista hosi nasaun rua.

Ho vizita ne’e, tuir Primeiru Ministru, Rui Maria de Araújo nu’udar oportunidade entre nasaun rua atu hametin relasaun bilaterál.

Antes ne’e, PM Rui ho nia homologu Hun Sen hasoru malu iha forum ekonomia mundiál ASEAN iha Malázia.

Delegasaun ne’e sei halo enkontru ho Câmara Comércio Industria Timor-Leste (CCI-TL) hodi debate kona-ba oportunidade reforsa koperasaun rejionál.

Delegasaun mos sei  vizita jardim herois iha Metinaru hodi presta homenajen ba herois sira, nune’e mos, partisipa selebrasaun loron FALINTIL iha Kuartel Jerál F-FDTL Fatuhada-Dili.

Ministru Estadu Prezidensia ba Konsellu Ministru hanesan mos portavos governu, Agio Pereira hatete, kontente simu vizita ne’e hodi hametin relasaun bilaterál ba momentu importante selebrasaun loron FALINTIL.

Hanesan nasaun foun, TL kontinua hametin relasaun ho nasaun viziñu sira para ajuda TL nia adesaun ba ASEAN. (jornalista: Rita Almeida)

Foto: Primeiru Ministru Reinu Kamboja, Samdech Akka Moha Sena Padei Techo Hun Sen. Foto espesial