SE MAKA FUNDADOR FALINTIL?

DILI - Estadu rekoñese ona loron 20 Agostu mak loron nasional ba FALINTIL. Maibé istória kona-ba sé maka fundador FALINTIL to’o agora públiku seidauk hatene lolo’os.

Tuir artigu ne’ebé hakerek nain Caetano Guterres Maulori ho títulu “sé maka fundador FALINTIL?” ne’ebé Timor Post sita, Kuarta (17/08), iha http://kiakilir.blogspot.com haktuir, FALINTIL, Forças Armadas da Libertasaun Nasional  Timor-Leste,  mai hosi transformasaun naran ne’ebé  Primeiro Comandante Rogerio Lobato ho pioneiros FALINTIL sira fo nanis kedas, ne’ebé  bolu “Forças Armadas da Desfesa do Povo Maubere”. Naran ne’e  iha tiha ona molok tama iha 1975.

Iha artigu ne’e hakerek nain hatete, Rogerio Lobato merese, iha direitu atu bolu fundador das FALINTIL.

Iha artigu ne’e nia konkluzaun mos hakerek nain haktuir, iha tempu ne’eba, Kay Rala Xanana Gusmão mos fo orientasaun barak oin sa atu forma Forças Armadas da Libertasaun nasional ida urgente atu desarma UDT bainhira hakerek nain hasoru Xanana iha sede Comite Central Fretilin nian, iha avo Xavier nia uma (Santa Kruz).

Hakerek nain haktuir, Xanana fo mos konsellos no orientasaun barak sobre sistema demokratiku, oin sa bele hetan relasoens di’ak  ho nasaun viziñu sira i kontribui ba paz i estabilidade rejional no internasional.

Tanba ne’e, hakerek nain konsidera Xanana hanesan konsilleru do kontra golpe no merese i iha direitu atu fo naran Fundador FALINTIL.

Entretantu hakerek nain haktuir mos katak, iha momentu ne’eba mos membros do Comite Central da Fretilin mos iha ona ideias atu forma Forças Armadas da Libertasaun Nasional  ida, iha sorumutu ne’ebé.

hala’o iha Alarico Fernandes nia uma, ho prezensa Mari Alkatiri, Alarico Fernandes, saudoso Carapina alias Lelo ho saudoso Nicolau Lobato, depois ikus mai, iha 20 de Agostu, saudoso Nicolau Lobato ho Mari Alkatiri  muda fali naran ida “Forças Armadas da Desfesa do Povo Maubere”ne’e  ba naran FALINTIL.

Tanba ne’e, hakerek nain mos hatete, Mari Alkatiri ho Alarico Fernandes, Saudozu Nicolau no Saudozu Carapina, mos merese i iha direitu atu bolu Fundador FALINTIL.(cao)

Timor Post