Governu Seidauk Notifika Komunidade ba Konstrusaun Aeroportu

DILI, (ANTIL) – Mesmu governu liu-hosi Sekretaria Estadu Terras no Propriedades (SETP) seidauk hasa’i notifikasaun ba komunidade sira ba konstrusaun aeroportu internasionál Komoro, maibé planu ne’e tama ona ba prioridade nasionál estadu nian.

”SETP seidauk halo notifikasaun ba komunidade sira ne’ebé hela besik área aeroportu Komoro Nicolau Lobato. Mais em-prinsipiu, governu kontinua ko’alia kona-ba kontrusaun aeroportu foun”, SE Terras no Propriedades, Jaime Xavier Lopes ba ANTIL, Kinta, (17/8) iha ninia serbisu fatin.

Hanesan nasaun, Timor-Leste tenke iha aeroportu di’ak ida, tanba aeroportu nu’udar odamatan hodi konvida investór hodi investe.

Tanba ne’e, nia husu ba Timor-oan hotu atu kolabora ho governu para trasa prosesu dezenvolvimentu. ”Objetivu ida hosi ukun rasik-án ne’e mak dezenvolvimentu”, katak nia.

Agora, governu seidauk halo notifikasaun, maibé sei bolu komunidade para enkontru. Importante ba povo sira atu hanoin ona futuru harii uma mais la’ós besik área ne’ebé tama ba planu konstrusaun aeroportu Komoro.

Saida mak durante ne’e governu halo sobre notifikasaun ou avisu mak planu estadu, atu oinsá komunidade sira bele hatene programa governu nian ba dezenvolvimentu. (jornalista: Rita Almeida)

Foto: Sekretariu Estadu Terras no Propriedade, Jaime Xavier Lopes. foto ANTIL

Lee mos ANTIL