CNRT Lakon Ema Matenek Ida

DILI - Membru Parlamentu Nasionál hosi bankada Partidu Consellu Nasionál Rekonstrusaun Timorense (CNRT) sente lakon matebian Eis Sekretáriu Estadu Obras Públikas Transporte no Komunikasaun (MOPTK), iha Governu Aliansa Maioria Parlamentar, Luis Vaz Rodrigues.

“Ami sente lakon ema ida kee matenek, derepente moras lori ba hospitál mais ikus hakotu Is ona, mais ita nia distiñu Nai mak kaer tanba ne’e ita labele iha hanoin katak ohin ka aban mais ita hotu nia dalan maka ida ne’e,”dehan Deputada Ângela Sarmento hosi Bankada CNRT ba Timor Post iha Parlamentu Nasionál, Kuarta, (14/09).

Nune’e sira hakarak hato sira nia sentidu lakon ba família  tomak tanba kompañeiru ne’e hakotu ona Is.

“Ami espera katak buat di’ak sira ne’ebé nia matebian Luis Vaz Rodrigues halo ita bele banati tuir hodi fóti hanesan lisaun ba ita hotu hodi bele hadi’a iha futuru,”tenik nia.

 Entertantu iha fatin hanesan, Vice Prezidente Parlamentu Nasionál, Duarte Nunes hosi Bankada CNRT hatutan, matebian ne’e hola parte iha família  bot CNRT nian, tanba ne’e CNRT sei marka prezensa.

“Partidu CNRT hatene ona tanba ne’e ami sei marka prezensa hotu tanba matebian Luis Vaz Rodrigues hola parte iha família  boot CNRT,”hatutan Vice Prezidente PN, Duarte Nunes ba Timor Post.

Nia dehan, sira nia Sekretariu Jeral hatene ona no fó orientasaun ona ba prosesu funerál sira nia kompañeiru ne’ebé hakotu ona Is.

Membru Governu Hato’o sentidu kondolénsias

Parte seluk, haktuir Sekretáriu Jeral Partidu CNRT atual Ministru Koordenador Asuntu Administrasaun no Ministru Administrasaun Estatál (MAE) Dionísio Babo hato’o sentidu kondolénsias ba matebian.

“Governu sente lakon ema ida, ha’u hanesan kolega ho nia no hamutuk ho nia iha Partidu CNRT sente lakon kuadrus ida ne’ebé maka servisu sempre ho profisionalismu, tanba ne’e hato’o sentidu kondolénsia ba nia no nia família  sira,” haktuir Dionísio ba jornalista iha MNEK, Praia dos Coqueiros, Kuarta, (14/09).

Dionísio hatete, maske matebian Luis Vas Rodrigues hakotu ona is, maibé nia hanesan ema Timor-oan no fo ona nia kontribuisaun ba estadu Timor Leste.

Maske nia partisipa iha governu mesmu uitoan ka barak, maibé matebian mós halo ona desizaun barak, entaun kontribui direitamente ba dezenvolvimentu país ninian.

Dionísio hatutan, maske eis Secretariu Estadu Obras Publika (MOP) ne’e iha parte fraka, maibé nia servisu sempre ho profisionalismu.

“Ha’u hatene katak durante ami servisu hamutuk iha V governu konstitusional, nunka koalia konaba kestaun partidu, nia sempre ko’alia kona-ba planu no programa governu nian ne’ebé maka iha,”hatete Dionísio.

Nia dehan, matebian ne’e servisu di’ak tanba nia ema tékniku ida, tanba partidu ho governu sente lakon, entaun sente triste tebes.

Portantu hanesan Secretariu Jeral partidu CNRT fo sentidu kondolensia maka’as ba família  matebian, tanba ne’e ema hotu reja atu nain maromak simu matebian ba iha nia kadunan santu.

Dionísio hatete, matebian depois hakotu is iha Hospitál Nasionál Guido Valadares (HNGV) nunka se rona informasaun ida kona-ba matebian moras saida.

Maibé depois nia hakotu Is mak foin rona fali katak, matebian sente sofre moras iha fuan, entaun nia ba HNGV no lakleur de’it hodi nia hakotu Is.

 Kazu Eis SEOP Taka

 Portantu relasiona ho kazu ne’ebé antes ne’e envolve hosi matebian eis Sekretáriu Estadu Obras Públiku ( SEOP) Luis Vas Rodriques, tuir Komisáriu KAK, Aderito Tilman hatete, Kazu ne’e Komisaun Anti Korupsaun (KAK)) remata ona prosesu investigasaun no haruka kleur ona ba Ministériu Públiku (MP) iha tinan 2016 nia laran. No Agora kazu refere kompetensia iha MP.

Maibé tuir Komisáriu KAK ne’e hatete, tuir lei 119 kódiku penal bainhira iha kazu ida arguidu mate ona, prosesu ba kazu refere bele estinge nia prosedementu ho Sansaun Kriminál. Maske prosesu sei iha investigasaun no to’o ona prosesu iha Tribunál.

“Maibé kestaun, agora arguidu eis SEOP Luis Vas Rodriques  mate ona. Tuir lei Kódigu penál  artigu 119 klarifika, bainhira ema ida konstitui nu’udar arguidu maka nia mate ona. Lei refere fó dalan atu estinge nia prosedementu ho Sansaun Kriminál, maske prosesu sei la’o hela no to’o ona Tribunál,”Informa Aderito Tilman iha nia servisu fatin Farol, kuarta, (14/09).

Eis Sekretáriu Estadu Obras Públika iha Governu Aliansa Maioria Parlamentar, Luis Vaz Rodrigues, hakotu is iha Hospital Nasionál Guido Valadares  (HNGV), iha oras tuku 13:30, tanba moras fuan.  Luis Vaz hakotu Is ho tinan 55.

 Família sira evakua matebian ba sala emerjénsia HNGV, Tersa (13/09), tuku 2 madrugada. To’o iha emerjénsia hetan atendimentu hosi Médiku Espesialista Internista.

 Haré ba kondisaun grave dadauk, médiku sira muda pasiente ba sala ICU, maibé liu tiha oras hira nia laran la konsege salva.

“Mai iha emerjénsia tuku 2 madrugada ho moras fuan, hetan atendimentu hosi médiku espesialista internista, depois muda ba sala ICU, maibé labele salva,” haktuir Xefe Emerjénsia HNGV, Doutór  Alito Soares, ba Timor Post, Tersa (13/09) kalan.  (rio/gus/max)

Timor Post