Don Virgilio: Jardin Lesidere sai Fatin Namora no Lanu

Bispu Dioseze Díli, Don Virgilio do Carmo da Silva lamenta tebes ba sarani sira ne’ebé uza Jardin Lesidere Inan Virjen nia hela fatin hanesan fatin ba namora no lanu hodi halo buat ne’ebé at.

“Fatin ne’e agora ahi laiha, kalan nakukun ita la hare buat ida. Entaun dalabarak ema tama mai iha ne’e (Jardin) tanba moru badak, sira mai hasoru malu iha ne’e, balun mai hemu tutuir moru depois hakilar,” Don Virgilio hato’o kestaun ne’e hafoin ramata prezidi prosesaun no reza hamutuk ho sarani sira iha Jardin Lesidere, Díli, Kinta (13/10/2016).

Don Virgilio lamenta hodi hatete “balun fali feto no mane dada malu mai iha ne’e, ita lahatene halo saída iha nakukun laran. Buat sira ne’e la’os ko’alia de’it maibé ha’u hare tanba ha’u hela besik kedas iha ne’e”.

Ema númeru um iha Dioseze Díli ne’e hatete dalabarak ona maka hato’o ba parte governu atu toma medida ba ema sira hahalok laiha morál ne’e, maibé parte Governu nonok de’it entaun aproveita oportunidade iha prosesaun refere bele aviza ba sarani hotu atu respeita fatin santu Inan Virjen nia horik fatin.

Bispu husu ba sarani sira hotu tenke respeita no kuidadu nafatin fatin santu Jardin Lesidere hodi hametin sarani sira nia fiar no devosaun ba nain Feto.

Don Virgilio dehan ita ema nia dignidade as tanba maromak nia illas nune’e ema idak-idak hakbesik ba fatin santu refere hodi husu Na’in Feto nia tulun no bensaun hodi hatutan moris nu’udár ema sarani katólika di’ak ida. (Efrem)

Matadalan