Tribunal Kondena Funsionario MAP Na’in Rua Tama Kadeia

DILI - Tribunál Distritál Dili (TDD),  liuhosi juiz koletivu, Kinta (13/10) iha desizaun final aplika kadeia tinan 7 ba arguidu Raimundo Pinto hanesan eis ofisial Finansas Ministériu Agrikultira Peskas (MAP) ho Funsionáriu Tékniku, Guilhermino Tiotoni, kadeia tinan 6.

Alende aplika kadeia, tribunál mós aplika pena selu indiminizasaun  rihun $49, 920 ba arguidu na’in  rua no kustu judisiáriu hamutuk $20 ba kada arguidu.

Arguidu na’in rua Ministériu Públiku akuza ho krimi tolu, hanesan krimi Pekulatu, Falsifikasaun Dokumentus Agravadu, ho krimi admitrasaun.  Liga ba projetu  haki’ak  ikan iha Munisípiu  6 ne’ebé tribunál la sita nia naran klaru . Ho valór orsamentu ba projetu refere Rihun Lima Nulu ($50.000).

Fundamentu Tribunál koletivu ne’e foti desizau finál ba arguidu na’in  rua, tan bazeia akuzasaun  Ministériu Públiku ho produsaun de provas, liga mós ho deklasaun sasin sira deklara, tribunál haré no análiza, provas provadu hotu. 

Tuir Juiz, maske prosesu ne’e nia fisikamente  la’o, no ikan sira ne’e balun kolleta ona, maibé diskonfia arguidu relatori ba projetu refere la justifikadu no diskonfia hamosu  krimi tolu mensiona iha leten.

Relatóriu  ne’e ho tendénsiu  manipulasaun,  tan projetu  haki’ak  ikan refere ho valor orsamentu Rihun Lima Nulu, maibé arguidu Raimundo  halo relatóriu  falsu hodi hetan tan orsamentu rihun sanulu ho intensaun ba fasilita aktividade viazen.

Bazeia ba relatóriu  hirak ne’e, konfirma iha tribunál maske arguidu sira nega faktus, maibé provadu duni arguidu sira futu lia antes ho intensaun atu hamosu prejuisu ba estadu. Bazeia ba faktus hirak ne’e tribunál kondena arguidu na’in  rua ho pena kadeia mensiona iha leten.

Hafoin lé sai desizaun, tribunál husu ba parte sira bainhira la konkorda  ho desizaun Tribunál premeiru instánsia, lei fó dalan atu parte sira bele halo rekursu ne’ebé ho nia prazu durante loron 15, hahú  desizaun.

Audénsia Julgamentu preside juiz koletivu, Duarte Tilman, Jacinto Babo, ho Maria Modesta. Ministériu Públiku  reprejenta hosi prokuradór Jacinto Babo, arguidu Raimundo  Pinto hetan asistensia legál hosi defensor Públiku  Marçal Mascarinhas, arguidu Gulermi Tiotonio hetan asistensia legal hosi advogadu Privadu  José Pedro  Camoes.

Hafoin desizaun ba kazu refere, Advogadu Privadu  José Pedro Camoes, la simu desizaun hosi tribunál ba nia kliente, maibé nia parte sei haré  kontiudu hosi desizaun akordaun to’o hotu foin bele foti desidi ba halo rekursu.

“Ami nia obrigasaun haré to’o hotu leitura akordaun durante loron 15,  karik la konkorda sei halo rekursu, agora desizaun ne’e los ou la los,  hanesan advogadu la kontente ho desizaun refere, tan tinan 6 kadeia ba ha’u nia kliente ne’e todan,” Tenik Advgadu José. (max)

Timor Post