GOVERNU DEVE US$ 100, AUMENTA BA OJE 2017

Primeiru Ministru (PM) Rui Maria de Araújo informa katak, oras ne’e dadaun Governu emprestimu tan osan husi komunidade internasionál ho montante 100 miloens dolares amerikanus, hodi aumenta ba iha Orsamentu Jeral Estadu (OJE) 2017, ne’ebé atu aloka ba dezenvolvimentu infraestrutura iha Timor Leste (TL).

“Maibé ida ne’e la signifika katak, ita bele foti tusan bo’ot tebes, tusan ne’ebé ita foti tenki sukat no limitadu, tinan oin Governu propoin montante US$ 100 milloens, maibé se haree husi estudu kona-ba kapasidade Estadu nian atu foti tusan, tanba iha estudu ne’ebé hatudu iha tinan hirak liu ba, hatudu katak, husi ita nia orsamentu ne’ebé iha, no husi ita nia nesesidade ne’ebé iha, haree husi mós ita nia fundu mina rai ne’ebé iha, ita sei bele husu tusan to’o billaun ida dolares amerikanus (US$ 1 bilion),” informa PM Rui Maria de Araújo ba jornalista sira iha Palácio Prezidénsia Aitarak Laran Díli, hafoin enkontru referál ho Prezidenti Repúblika (PR) Taur Matan Ruak, Kinta (13/10).

Xefi Governu ne’e hatutan polítika ida Governu husu impréstimu ne’e, atu suporta infraestrutura, tanba nesesidade infraestruturas iha Timor Leste (TL) ne’e bo’ot, li-liu estrada, pontes no buat seluk tan.

Maibé Rui Araújo dehan, agora ne’e, Timor Leste nia tusan foin mak US$ 300 milloens, tanba polítika ne’ebé mak Governu adopta ne’e, halo kombinasaun hanesan, osan balun foti husi tusan, balun husi fundu minarai nian.

Xefi Governu ne’e afirma, durante ne’e, Governu impresta osan husi JICA, ADB ho Banku Mundial. Banku hirak ne’e ho imprestimu ba Estadu Timor Leste (TL) ho naran, imprestimus konsesionais.

“Ne’e la signifika katak, ita la selu, tinan-tinan ita komesa programa dada’uk ona buat bal-balun para atu selu, la’os selu nia funan, maibé selu nia osan inan ne’ebé ita utiliza,” katak Xefi Governu ne’e.

Rui Araújo esplika, konsensionais ne’e signifika katak, nia funan ki’ik, no bele selu iha tempu naruk. Maibé Xefi Estadu ne’e dehan, prosesu selu osan impréstimu sira ne’e, balun sei selu iha tinan 30 no balun iha tinan 40 mai.

“Ita nia osan ne’e limitadu, sé ita sukat didi’ak, ita nia osan ne’ebé ita tau iha fundu petroleum, ne’ebé ita tau iha investementu iha estranjeiru, nia funan ne’e bo’ot, depois osan sira ne’ebé ita husu impréstimu ne’e, nia funan ne’e ki’ik,” tenik Rui Araújo.

Entaun Xefi Governu ne’e esplika, inves atu hasai osan fundu petroleum atu investe ba fundu infraestrutura, husik hela osan fundu petroleum ne’e atu produz funan, hodi aban bainrua nia funan ne’e bele lori selu fali tusan.

Entretantu hahú iha tinan 2013 to’o oras ne’e Governu kontinua implementa polítika emprestimu husi JICA, ADB hodi finansia ba konstrusaun estrada Díli, Manatuto, Baucau no estrada Dili-Liquiça,Tibar no Ermera. Entretantu Orsamentu Jeral Estadu 2017, iha semana oin Governu sei aprezenta ba Parlamentu Nasionál (PN) atu halo diskusaun.cos

Jornal Nacional