Kazu Timor Post ho PM, KI Bele Fo Pareser

DILI, (ANTIL)– Konsellu Imprensa (KI) labele halo advokasia ba kazu Timor Post ho Eis Asesór Ministériu Finansa (MF), Dr. Rui Maria de Araújo atuál Primeiru Ministru (PM) tanba akontese antes KI estabelese, maibe hare’e ba nia knar no funsaun, KI bele fo pareser.

“Tanba ne’e mak ba ami Konsellu Imprensa prontu, sé karik iha prosesu legál ne’ebé la’o daudaun presiza Konsellu Imprensa nia pareser,” Prezidenti KI, Virgilo Guterres hatete ba ANTIL, Sesta (14/10/2016) iha Faról, Dili.

Hanesan órgaun ne’ebé iha responsabilidade atu defende liberdade imprensa iha Timor-Leste, Virgilio esklarese, Konsellu Imprensa sente, loloos kazu ne’e lapresiza akontese. Tamba maski akontese erru iha nia publikasaun notisias, maibe ida ne’e laos erru grave.

“Mezmu Timor Post ho irmaun Raimundus Oki halo erru jornalizmu grave ruma maibé erru ne’e la natoon atu lori kazu ne’e ho krime kódigu penál,” Virgilio dehan.

Ba kazu ne’e, esplika Virgilio, KI nia hanoin, loloos Ministériu Públiku uza Lei Komunikasaun Sosiál atu julga Oki ho Timor Post. Tanba kazu ne’e iha ona tribunál, KI labele halo pedidu ruma atu trava. “Maibé advokasia ami la’o, públikamente ka pesoalmente ami dehan triste uitoan tanba lori kódigu penál  atu julga, loloos uza lei komunikasaun sosiál.”

Enkuantu kazu refere sei adia julgamentu iha loron 2 Dezembru, Virgilo dehan, atu halo mediasaun depende ba Dr. Rui, Timor Post no Oki. “Por ezemplu to’o iha tribunál sira deside dehan ami lakohi kontinua no halo mediasaun de’it, ne’e laiha problema, KI sei lahalo intervensaun ba tribunál atu hapara kazu ne’e”.

Ko’alia publikasaun notísia Timor-Post nian iha loron 10 Novembru 2015 bainhira Diáriu Timor Post publika notísia eis asesór MF Rui Maria de Araújo rekomenda no asina dokumentu ida hodi fó projetu data sentrál ba kompañia Indonézia ida, iha fallansu balun liuliu ba fonte maibé iha prosesu legál sala ne’e tanba intensaun ema nia ka omisaun?

”Kesalahan yang disengaja ka tidak disengaja, disengaja ne’e bele hanoin ne’e persegisaun iha ona tinan hirak liubá ne’e Timor Post tuituir ema ida ka rua atu to’o ikus sai hanesan ne’e mas pur omisaun ha’u rona katak Timor Post ho Oki halo tiha pedidu deskulpa ona, soké pesoalmente ha’u seidauk haree pedidu deskulpa ne’e ninia konteúdu,” Virgilio dehan.

Bainhira kazu ne’e hanesan defamasaun presiza haree nia intensaun. Sé intensaun bele ba oin, maibé Lei Komunikasaun Sosiál iha.

“Tanba tidak sengaja ha’u hanoin normál husu deskulpa kuandu sengaja paling ita husu atu labele repete tan tuirmai,” Virgilio hatutan tan.

Enkuantu, kazu sira ne’ebé akontese depois KI hamriik. Sujestaun husi KI ba jornalista no mídia sira bele liuhusi KI. “Iha prosesu mediasaun mak parte rua ne’e ida lasatisfeitu hakarak lori nafatin ba tribunál ne’e nafatin, dalaruma ema hanoin katak to’o iha Konsellu Imprensa ne’e prontu para ona iha ne’e. Sé ema hotu aseita ida rekoñese sala no ida fali memaafkan,”  Virgilo dehan.

Enkuantu, Virgilio afirma kazu ne’ebé akontese larefere ba Primeiru Ministru maibé nu’udar eis asesór MF nian no sidadaun baibain iha direitu. “Iha mundu liberdade imprensa ne’ebé sempre kestiona mak ne’e, Dr. Rui agora  hanesan Primeiru Ministru, bainhira pejabat publik sira foti kazu hanesan ne’e, sira-nia pozisaun públiku bele mós hanesan presaun ida ba tribunál atu hola desizaun ida ne’ebé lajustu”.

Tanba iha lei, ema polítiku sira iha imunidade. “Kuandu sira komete krime ruma ninia ancaman mais de 2 anos ne’e mak sira foin suspende maibé menus ida ne’e sira iha imunidade, kestaun mak ne’e, kuandu sira akuza ema seluk ho ancaman lebih dari 2 tahun prosesu lei prevé ka la’e katak sira tenke sai tiha lai husi pozisaun públika ne’e hanesan sidadaun baibain mak ba prosesa, hotu tiha mak filafali mai ka sira nafatin hanesan Primeiru Ministru”, Virgilio haktenik.

Ida ne’e mak kestaun legál ida ne’ebé durante ne’e la’o, tanba ne’e mak tuir prinsípiu internasionál ema pejabat publik laiha direitu atu lori prosesu legál hasoru sidadaun maibé iha direitu atu esklarese ba públiku katak saida mak mídia hakerek ne’e laloos ka sala. (Jornalista: Maria Auxiliadora / Editor: Gantry Meilana)

Foto: Prezidenti Konsellu Imprensa. (Photo: ANTIL/Antonio Goncalves)