Zenilda Gusmao Harii Klubu Futebol

DILI (ANTIL) - Emprezaria Timoroan, Zenilda Gusmao nudar oan feto hosi eis Prezidenti Republika no Primeiru Ministru, Kay Rala Xanana Gusmao harii ona klubu futebol ho naran Lalenok FC.

Zenilda Gusmao hari’i klubu ne’e hamutuk ho nia kaben Pedro Belo atual Komandante PNTL Munisipiu Dili hodi kompete ho klubu Liga Futebol Amadora (LFA) ne’ebe organizasaun liga refere xefia hosi Nilton Gusmao.

Lalenok FC dadauk ne’e mos hili ona eis treinador FC Aitana, Muhammad Nico ba klubu ne’e nia treinador no iha ona prosesu hili jogador ne’ebe klubu prepara. Klubu refere, Nico esplika, ninia estatutu preparadu no rejistu ona iha Notariadu Ministériu Justisa, iha Sekretaria Estadu Juventude no Desportu no mós Federasaun Futeból Timor-Leste  (FFTL).

Nia dehan Lalenok FC prontu atu partisipa Liga Segunda Divizaun hosi Liga Futeból Amadora (LFA) époka 2016-2017. “Ami agora dadauk rekruta jogadór sira atu prepara ba treinu. Jogadór hamutuk 22 maka ami rekruta ona. Ami rekruta jogadór sira hosi Maliana, Liquiça, Aileu no Viqueque,” Nico dehan ba ANTIL iha sede FFTL, Bairos dos Grilhos, Dili, Sesta (14/10).

Nico hatutan enderesu hosi Lalenok FC iha Delta 4 maibé treinu iha Kampu Demokrasia. “Ita forma jogadór ne’e la’ós fásil. Ita tenki lori tempu no disiplina iha treinamentu. Disiplina labele fuma, hemu tua no kalan deskansa,” treinadór informa.

Iha epoka 2015/2016 AD. SLB ne’ebe nia prezidenti maka Kay Rala Xanana Gusmao mak sai kampiun ba Liga Futebol Amadora no dadauk ne’e sei iha oportunidade hodi hetan tan titlu kampiaun iha Super Taxa. Iha Super Taxa, AD. SLB sei hasoru kampiaun Taca 12 de Novembru, AS. Ponta Leste ne’ebe lidera hosi Inacio Moreira, atual Vise Ministru Obras Publika, Transporte no Telekomunikasaun hamutuk ho Deputadu Osorio Florindo atual Vise Prezidenti FFTL.

Iha LFA dadauk ne’e hamutuk klubu 21 mak kompete ona iha Primeira Divisaun no Segunda Divisaun. Klubu Primeira Divisaun ne’e maka, AD. SLB, Karketu Dili FC, Porto Taibessi, FC. Academica, AS. Ponta Leste, FC. Carsae, FC. Aitana no DIT FC.

Klubu 13 ne’ebe kompete iha segunda Divisaun mak, Cacusan FC, FC. Zebra, YMCA, FC. Assalam, FC. Lica-Lica, ADR. Uniao, Sporting Clubo de Timor, Benfica Dili, FC. Kablaki, FC. Nagardjo, Atletico Ultramar.

Iha epoka 2016/2017, klubu segunda divisaun Cacusan FC no FC. Zebra sa’e promosaun ba Primeira Divisaun hodi troka FC. Aitana no DIT FC ne’ebe hetan degradasaun. (Jornalista: Xisto Freitas / Editor: Gantry Meilana)

Foto: Zenilda Gusmao ho nia katuas oan Pedro Belo, Komandante PNTL MUnisipiu Dili ne'ebe sira rua dadauk ne'e hari'i ona klubu futebol Lalenok FC ne'ebe sei kompate iha LFA. Photos: Facebook Zenilda Gusmao.