APC Prontu Apoiu CI Promove Liberdade Imprensa

Australian Press Council (APC) hatudu sira nia prontidaun apoiu Conselho de Imprensa Timor- Leste (CI) hodi hamutuk dezenvolve media iha Timor-Leste no hamutuk promove liberdade espresaun no imprensa. Komitmentu APC nian ne’e afirma direitamente husi Prof. David Weisbrot AM, nu’udar chairwainhira simu delegasaun CI iha edefisiu APC Sydney-Australia, Tersa (15/11/2016).

Delegasaun Timor-Leste kompostu husi Prezidente Virgilho da Silva Guterres, ho nia membru Jose Maria Ximenes, Paulo da Cruz Araujo, Hugo Fernandes, Francisco Belo Simôes da Costa ho Diretora Ezekutiva Ana Teresa Sequeira halo vizita traballu ba Sydney hodi introdus Conselho de Imprensa ba instituisaun reguladora media nian iha Australia no mós haree posibilidade sira kooperasaun nian.

Iha enkontru ne’e, partisipa mós Executive Director John Pender, Director of Complaints Paul Nangle, no Director of Research and Communications Michael Rose ne’ebé mak introdus kona-ba lalaok serbisu no kompetensia APC nian nu’udar orgaun reguladora ba media imprimi iha Australia no mós mekanizmu simu keixa, halo advokasia, inklui mós polótika no planu asaun APC nian iha 2016-2017.

Atu hametin kooperasaun ne’e, CI Timor-Leste aprezenta ideia atu kolabora ho APC iha futuru bele estabelese muzeum ida ba serbisu media nian no mós harii monumentu Balibo Five hodi fó onra ba kontribuisaun jornalista sira nian ba Timor-Leste nia ukun rasik-án liliu kontribuisaun jornalista Australiano nain lima (5) ne’ebé mate iha Balibo tanba oho husi militár invazor Indonézoa wainhira halo invazaun mai Timor-Leste iha 7 Dezembru 1975.

“Ami loke komunikasaun ho APC atu iha futuru bele serbisu hamutuk promove liberdade imprensa no hakerek istória kona-ba involvementu no sakrifisu jornalista sira nian durante invazaun to’o faze independensia,” hateten Prezidente CI Virgilho Guterres.

Ideia ne’e hetan apresiasaun boot husi autoridade sira APC nian no sira husu atu bele formula didiak kooperasaun iha futuru entre instituisaun reguladores rua ne’e para bele introdus ideia sira ne’e iha asaun konkreta.

Aleim ida ne’e CI mís introdus ba kona-ba lei komunikasaun sosiál ne’ebé aprova ona husi Konselho Ministrus no promulga ona husi Prezidente Republika iha 2014 hodi fó espasu boot ba promove liberdade imprensa iha Timor-Leste.

“CI Timor-Leste nia papel importante atu responde ba keixas nian, tanba ba oin sei fó oportunidade didiak atu rezolve keixas ne’ebé kontra jornalista ka publikasaun media nian tuir dalan mediasaun duke liuhusi tribunal no ka’er ba prosesu penal nian hanessan Denunçia Caluniosa (pasal pemfitnahan) ne’ebé akontese dadauk. Ne’e mekanizmu alternativu ida ne’ebé rezolve keixas sedu no bele efektivu liu ba parte hotu-hotu.” informa Paulo da Cruz Araujo, nu’udar membru CI.

APC mós informa hikas katak, rezolusaun alternativu ne’ebé sira hala’o, efetivu tebtebes no parte hotu-hotu iha preferensia ba mediasaun tanba iha Australia lei defasaun ohin loron lori tempu no mós karun tebe-tebes kuandu hato’o ba tribunal. APC mós afirma katak la iha biban atu kriminaliza jornalista iha Australia tanba ne’e, disputa sira ne’ebé involve publiku ho jornalista sira, sempre liuhusi APC.

 “APC prontu ajuda no loke komunikasaun ho CI atu elabora nesesidadi balun ne’ebé CI presiza husi APC, exemplu APC bele ajuda fornese materia kona-ba ajudikasaun no halo planu estratejia, inklui simu funsionariu CI nian halo estudu komparativu iha APC,” afirma Paul Nangle, Director of Complaints APC.

Media Entertainment and Art Alliance prontu kolabora iha kapasitasaun jurnalizmu  

Bainhira Delegasaun CI halo inkontru ho Media Entertainment and Art Alliance (MEAA) iha loron 16 Novembru 2016, Executive Director Paul Murphy no Jane Worthington hosi International Federation of Journalist (IFJ) Asia Pacific hakarak tebes rona kona-ba liberdade imprensa iha Timor-Leste liga ba kazu sira ne’ebé involve jornalista tanba kestaun profesionalismu. Sira aseita ba oin atu hare oinsa bele fo apoiu ba dezenvolvimentu profesionalismu jornalista sira nian liuhosi formasaun no mos bolu estudu.

“IFJ loke oportunidade atu bele ajuda fó treinamentu reportajen investigativu ba jornalista Timor-oan sira no fo apoiu kapasitasaun rekursu humanus iha area jornalismu,” hateten CEO Paul Murphy.

Delegasaun CI mós loke komunikasoens entre reprezentante Asosiasaun Jornalista Timor-Leste (AJTL) iha CI, Hugo Fernandes ho IFJ no mos hematin komunikasaun entre reprezentante Timor Leste Press Union (TLPU) iha CI, Francisco Belo Simôes da Costa, atual Prezidente TLPU.

Iha enkontru ne’e, CI, MEAA, no IFJ mós fó hanoin ba malu oinsa maka asosiasaun media sira ezerse sira nia funsaun atu fó advokasia konkreta ba nia membru sira ne’ebé infrenta justisa no hetan violasaun fizika. IFJ konsidera kualker aktu violensia ne’ebé kontra serbisu jornalista iha publiku nu’udar meus ou tentativa direita atu ‘hamate’ liberdade imprensa.

Kabe ba situasaun Timor-Leste nian, AJTL ho TLPU komitimentu fó advokasia ba violensia sira ne’ebé maka autoridade siguransa sira halo ba jornalista. Husi kazu konkretu rua maka hanesan oknum Polísia Nasional Timor-Leste (PNTL) husi unidade Tranzitu ne’ebé baku jornalista Business Timor, Geronimo Amaral da Silva, ne’ebé akontese iha 25 Julhu 2016, inklui mós kazu violénsia ne’ebé jornalista TAFARA Online infrenta husi membru balun husi PNTL ho FALINTIL-Força Defesa de Timor-Leste (F-FDTL) iha Suai-Covalima, foin lalais ne’e.

“Maioria kazu violensia hasoru profisaun jornalista involve husi autoridade sira seguransa nian. Tanba aktu ne’e kategoria krimi maka AJTL ho TLPU fó adovikasia hodi lori ba Ministeriu Pubiku hodi prosesa tuir Lei. TLP ho AJTL mós hasai deklarasaun liuhusi konferensia imprensa kondena aktu sira ne’e no husu atu autoridade sira tenke respeita knar jornalista sira nian ne’ebé garante iha Konstituisaun RDTL artigu 41-42 kona-ba liberdade espresaun no imprensa,” esplika Hugo Fernandes.

Prezidente CI Virgilho Guterres reafirma katak CI iha ona planu atu halo akordu ida ho Komando F-FDTL no PNTL para indente malu iha ida-idak nia serbisu ba interese nasionál hodi bele minimiza dezintendimentu entre PNTL no F-FDTL ba serbisu profesional jornalista sira nian.

IFJ husu hapara ‘kriminaliza’ jornalista

Iha loron hanesan, iha lorokraik ekipa CI hasoru Legal Consultant IFJ Asia Pacific Jim Nolan. Jim interesadu atu hatene progresu kazu PR Rui Maria Araujo hasoru jornalista Timor Post, Raimundo Oki no Lourenço Martins. Hafoin rona tiha esplikasaun hosi Paulo da Crus Araujo, membru Conselho de Imprensa nian, nia konsidera prosesu ne’ebé PM Rui Araujo, kontesta ne’e, ladun fó espasu no hamosu lisaun ladiak ba promove liberdade imprensa iha futuru Timor-Leste.

Jim Nolan nu’udar pesoal ida iha IFJ ne’ebé akompaña kazu PM Rui Maria de Araujo hasoru Timor Post, no ajuda distribui publikasaun iha media internasional sira kona-ba kazu refere. Nia haree katak la merese duni ba Timor-Leste nu’udar nasaun demokratiku ida no garante liberdade imprensa ho adopta konvensoens internasional kontra ‘kriminaliza hasoru jornalista’ kondena fali jornalista ho artigu ‘denunsia kalunioza.

“Ha’u haree kazu ne’e halai liu ba étika tanba ne’e la presiza halo prosesu krimi, maibé prosesu sivil, ne’ebé CI mós bele halo mediasaun,” Dehan Jim Nolan.

Nia mós oferese nia tempu atu bele fó apoiu CI hodi fó parser kona-ba promove liberdade imprensa iha Timor-Leste no nia prontu ajuda AJTL ho TLPU atu fó advokasia ba jornalista sira.

Australian Communications and Media Authority aseita fahe referensia ho CI

Delegasaun mís hetan fasilita husi Australian Press Council (APC) hodi realiza enkontru ida entre CI ho Australian Communications and Media Authority (ACMA) iha loron 16 Novembru lorokraik. Enkontru ne’em alen de introdus CI ho ninia knaar sira ba orgaun regulador ne’e, sai mós oportunidade ida hodi rona papel regulasaun sira ne’ebé mak autoridade ne’e halo.

Iha enkontru ne’e, Prezidente CI informa kona-ba funsaun CI nian nu’udar orgaun mediador no mós regulador ne’ebé kobre hotu media imprimi, elektronika no mós online. Alen halo mediasaun bainhira simu keixa ruma, CI mós halo knar regulasaun nian hodi fó akreditisaun ba jornalista no sira hotu presiza rejistu la’os nu’udar lisensa maibé atu iha dadus kona-ba númeru profesionais sira iha teritoriu Timor-Leste.

“Tanba ami foun ami presiza mekanizmu, matadalan, prosedur sira nu’udar instrumetu sira atu apoiu. Ami halo ona viajen ba Indonézoa, Portugal no agora Australia atu bele hetan referensia nune’e ami bele iha mekanizmu rasik para bele serbisu.” dehan Prezidente CI Virgilio Guterres.

Iha momentu ne’e, Emma Rossi, Media Manager iha divizaun Kooperasaun no Peskiza introdus pesoal profesionais sira iha area ida-idak hanesan Colin Payne, Manager Regulatory Frameworks and International Engagement Section; Phyllis Fong, Manager Community Broadcasting Group; no Elizabeth Press, Manager Broadcasting Standards; hodi aprezenta espesifkamente kona-ba sira nia serbisu iha area ida-iak.

ACMA nu’udar orgaun regulador responsabiliza hodi tau matan ba protesaun konsumedores iha Australian broadcasting nian, haree liu ba aktu serbisus broadcasting nian hanesan aplikasaun kodigu praktika, implementasaun programa tuir estandar no tau matan ba kondisaun sira hetan lisensa nian.

CMA prontu atu fahe referensia ho CI atu bele apoiu ba establesementu mekanismu sira serbisu nian liliu regulamentu sira broadcasting no online nian. (*/mtd)

Matadalan