Prezidente
Repúblika timoroan, Taur Matan Ruak, apela iha loron-segunda ne'e ba unidade
hosi timoroan sira hotu, importante hodi hetan independénsia, hodi nune'e bele
kuda no ku'u rezultadu sira hosi konkista ne'e.
"Atu
dezenvolve nasaun, ita presiza unidu nafatin, no serbisu iha dame no
estabilidade. Ha'u apelu ba timoroan tomak: atu ita serbisu hamutuk hodi nune'e
Independénsia bele sai hanesan fonte ida ba prosperidade boot no felisidade
nian", hatete hosi Taur Matan Ruak iha loron-segunda ne'e.
"Nasaun
presiza ema hotu, mane sira no feto sira hosi rai ne'e nian. Dalan di'ak hodi
fó onra ba memória hosi mártir sira no asuwa'in sira nia terus maka harii
sosiedade ida ho moris di'ak maka'as, estabilidade no seguransa", nia
hatete.
Taur
Matan Ruak ko'alia iha serimíonia sira ne'ebé marka, ofisial, tinan 41 ba
proklamasaun independénsia Timor-Leste nian, ne'ebé halo iha Lospalos, iha
munisípiu Lautém nian.
Durante
selebrasaun sira, xefe Estadu fó ona Ordem de Timor-Leste, kondekorasaun
importante liu hosi Timor-Leste, ba "veteranu na'in 42 ne'ebé simu no
proteje ona líder sira rezisténsia nian iha momentu oioin" no ne'ebé
"determinasaun no korajen sai hanesan banati hosi vontade atu manán"
hosi povu timoroan nian ne'ebé bele hetan independénsia.
Hatudu
satisfasaun ba buat ne'ebé Timor-Leste hetan ona, Taur Matan Ruak alerta ona ba
"dezafiu sira no susar sira" ne'ebé nasaun hasoru iha tempu sira tuirmai,
liuliu hodi hadi'a nível sira edukasaun no saúde nian.
"Atu
ita hetan ita nia objetivu nasional sira dezenvolvimentu nian, Estadu tenki
hadi'a lalais kualidade hosi Administrasaun no serbisu públiku sira nian",
nia hatete.
"Dezafiu
seluk maka aumenta produtividade hosi ekonomia nasional. Aproveitamentu hosi
esforsu agrikultór sira no hosi rikusoin hosi ita nia rain nian eziji polítiku
sira atu hametin aumentu hosi produtividade. Ne'e signifika katak agrikultór
sira no área produtivu nasional bele, neineik, prodús ho dalan efisiente
liu", nia afirma ona.
Ba
xefe Estadu, ne'e hanesan "prioridade nasional ida ho importánsia
maka'as", ne'ebé obriga hadi'a kualidade edukasaun nian no formasaun
profisional, importante atu nasaun aumenta produsaun maka'as no di'ak.
"Atu
ita iha nasaun ne'ebé ita hakarak, ita presiza hametin polítiku sira ne'ebé
evita aumentu ba dezigualdade sira no bele halo distribuisaun ida di'ak ba
rikusoin sira", nia defende.
"Iha
nafatin pobreza barak iha ita nia rain. Aumentu ba seguransa alimentar no
kualidade hosi Nutrisaun hanesan prioridade sira importante liu hodi hadi'a
kondisaun sira moris no saúde família sira nian, liuliu hosi labarik no joven
sira", nia hatete.
"Ita
hakarak halakon nutrisaun ladi'ak no subnutrisaun iha rai ida ne'e. Maibé ne'e
bele halo ho partisipasaun hosi sidadaun tomak no hadi'a neineik ekonomia
família sira nian. Ho de'it determinasaun no empeñu hosi sidadaun sira no hosi
família sira maka ita bele hadi'a alimentasaun no saúde populasaun sira nian,
iha nasaun tomak", nia insisti.
Xefe
Estadu hatete katak ema hotu iha Timor-Leste tenki serbisu hodi harii
"sosiedade ida ekilibradu liu no ladún iha frakeza", atu timoroan
sira tenki "koriji gastu maka'as hosi família sira" no "fó valór
liu ba poupansa ba futuru".
Hanesan
ezemplu, nia haktuir gastu maka'as iha tradisaun kultural oioin timoroan nian
ne'ebé, tuir nia hatete, katak ema hotu hatene katak bele "respeita
kultura no tradisaun sira hosi bei'ala sira lahó gastu ida ne'ebé maka'as ka
halo arbiru de'it".
"Ho
dalan hanesan ne'ebé ita fakar raan hodi hetan Independénsia, agora ita tenki
fakar kosar-been barak hodi ita bele kuda no ku'u rezultadu sira Independénsia
nian".
Hodi
hanoin hikas loron 28 Novembru 1975 ne'ebé hanesan loron proklamasaun
independénsia nian, Taur Matan Ruak hatete katak momentu ne'e "fó lian ba
aspirasaun klean ida timoroan sira nian" no konsisti "hanesan hakat
importante ida iha afirmasaun hosi nasionalizmu timoroan nian".
Nia
evoka liuliu ba memória hosi prezidente ne'ebé proklama ona independénsia,
Francisco Xavier do Amaral, no hosi "saudozu asuwa'in Nicolau Lobato"
nune'e mós sira seluk, ne'ebé durante okupasaun indonéziu tinan 24 nia laran,
luta ho sakrifísiu hodi nune'e Timor-Leste hetan liberdade.
Falta
de'it fulan neen atu Timor-Leste kompleta tinan 15 nu'udat Governu
independente, Timor-Leste halo ona avansu importante sira, hodi hametin dame no
rekonsiliasaun no harii Estadu ida direitu no demokrasia estável.
Hanesan
ezemplu foun, nia aponta ba eleisaun lokal sira ne'ebé akontese foin lalais
ne'e, ba líder tradisional sira no xefe sira suku nian no aldeia sira nian,
ne'ebé hanesan "ezemplu ida estabilidade no maturidade hosi sosiedade
nian".
Taur
Matan Ruak apela ona ba timoroan sira atu iha empeñu hanesan iha eleisaun
prezidensial sira no lejislativu sira iha tinan oinmai, mantén dame no
estabilidade, rikusoin ne'ebé importante hodi iha dezenvolvimentu.
Xefe
Estadu husik ona nota pozitivu oioin ne'ebé halo tiha ona, hahú hosi desentralizasaun
administrativu to'o konstrusaun hosi rede ida eskola sira nian no sentru saúde
sira nian, dezenvolvimentu ba infraestrutura sira baze nian - inklui lori 90%
hosi eletrisidade ba populasaun sira.
SAPO
TL ho Lusa - Foto de Choro Rafaél Jr. em Facebook
Sem comentários:
Enviar um comentário