TINAN 2017, SOE LIXU ARBIRU SEI KONA MULTA

Ministru Estadu Koordenador asuntu Justisa no Ministru Administrasaun Estatal, Dionisio Babo, informa, hahú tinan oin 2017, komunidade sira soe lixu arbiru no para kareta iha estrada ninin sei selu multa ba Estadu.

“Tinan oin lixu ne’ebé ita nia komunidade sira soe arbiru deit tenki selu multa, ho mos transporte ne’ebé mak para iha Dili laran ne’e mós ba iha tinan oin tenki mós selu hotu ona, tanba lei halo hotu tiha ona, hein ba tinan oin hala’o implementasaun deit ona,”esplika Dionisio ba jornalista sira, iha edifisiu Ministériu Administrasaun Estatal Caicoli, Dili, foin lalais ne’e.

Nia hatutan, komunidade sira ne’ebé mak para kareta arbiru ne’e komesa tinan oin selu ona, osan sei hatama ba iha kofre Estadu.

“Lixu iha Dili laran, kada loron iha Dili laran ne’e produs lixu porvolta 190 toneladas lixu, ne’ebé mak ami rekolha ne’e provolta 50% deit. Tanba kada tinan ita gasta osan ba lixu ne’e provolta  $ 2 Millioens, lor-loron iha 50 komeonetas mak halo operasaun iha Dili laran, komeonetas ida lao dala tolu kada loron ida,”esplika Dionisio Babo.

Oras ne’e dadaun entrega ona ba iha Munisípiu Dili, espera katak sei servisu diak liu tan hodi kontrola lixu iha Dili laran.

“Ami husu kolaborasaun ba maluk Timor oan sira liu-liu iha loron bo’ot Natal no Tinan Foun ne’e favor ida hotu-hotu soe foer iha nia fatin ou tau hamutuk iha fatin lixu,” tenik Dionisio Babo.

Nune’e Dionisio Babo husu ba iha Administrador Postu no Xefi Suku sira hodi servisu maka’as atu kontrola sira-nia komunidade hodi soe foer tuir nia fatin.

“Ita moris iha Plaza la’os ita moris iha fahi luhan, ne’ebé ita hatene nia hijeniu hirak ne’e, ha’u husu kolaborasaun ba ita hotu, tanba Natal no Tinan Foun ne’e ita nia sarani katolika sira nia, liu-liu udan hanesan ne’e ita hotu tenki servisu kolabora ba malu para bele halo sidade ne’e mós nafatin,” esplika Dionisio Babo.avi

Jornal Nacional