TL SEI KONVOIU SIMU MARVI

Prestasaun reprezentante Timor Leste (TL), liu husi nia sidadaun feto ida, Maria Vitoria alias ‘Marvi’ foin lalais ba tuir kompetisaun Dangdut Academy Asia 2 (DAA2) iha Indonesia, no konsege tama to’o kuatru finais, maka komunidade iha kapital Dili planeia ona sei halo konvoiu (pawai) hasoru Marvi wainhira fila mai TL.

“Maria Vitoria fila ita sei halo pawai penyambutan iha Aeroportu Internasional Nicolau Lobato bainhira nia fila mai, tanba nia hatudu prestasaun di’ak iha rai liur,” hateten Diretór Jerál Sekretaria Estadu ba Juventude no Desportu (SEJD), Metodio Caetano Moniz, ba jornalista sira, iha nia knár fatin gabinete SEJD eis-sional Lecidere Dili, Tersa (27/12/2016).

Teknikamente atu halo saida de’it ba Maria Vitori la problema, maibé importante mak tenki halo penyambutan ba nia (Marvi), tenik Nia.

Metodio salienta, Maria Vitoria tama iha 4 besar, SEJD sente orgulho tebtebes núdar ema Timor, tanba joven ida ne’ebé kompetativu no orgulho bo’ot hanesan ema Timor-Leste.

Ne’e duni Marvi komprova duni, mesmo nia sai ona hori kalan, maibé prestasaun ne’ebé nia hatudu ba ida maksimal to’o iha fatin refere.

“Desde husi inisiu ema barak akompañia haree liu televizaun sente orgulho ho Maria Vitoria ninia prezensa iha ne’ebá. Signifika katak, ida ne’e bele sai banati ba jovens sira seluk, kuandu hatudu prestasaun bele kompete ho Nasaun sira iha liur, ita nia povu ne’e sei fó apoiu no orgulho,” realsa Metodio.

Metodio dehan, Maria Vitoria agora daudaun la’ós ninia inan-aman nian de’it, mais Maria ne’e ema Timor nian tomak. Ito

Jornal Nacional