POVU BARAK LA VOTA…!!!

Jornal Nacional Diário - Editorial

Eleisaun Presidensial tinan 2017 nee termina ona. Kandidatu nain 8 nebe konkore iha eleisaun Presidensial nee, ikus mai povu deposita sira nia konfiansa ba kandidatu Presidente Republika husi Partido FRETILIN, Francisco Guterres ‘Lu-Olo’ sai Presidente Timor Leste nian ba periodo 2017 – 2022 tamba hetan votos 57,08 %, baseia ba resultado provisorio eleisaun presidensial nian nebe STAE publika.

Ho prezentajen 57,08 nee hatudu katak Lu-Olo ultrapasa ona bareira eleitoral 50+ 1, hodi nunee garante ona Lu-Olo sai Presidente Republika Demokratika Timor Leste nian ba tinan lima oin mai.

Eleisaun presidensial nee nudar festa demokrasia, nebe povu hotu hotu iha dever no obrigasaun atu partisipa iha eleisaun presidensial maibe na realidade eleisaun presidensial ba tinan 2017 nee vontade povu nian partispa eleisau nee minimu tebes.

Baseia ba relatoria STAE nian, total votantes iha teritoriu Timor laran tomak hatudu katak total votantes 743.150 eleitore rejistrado maibe tuir votasaun ema 504,730 (67,92%), no eleitor nian no 238,420 (32,8%) mak la vota.

Agora duvida nebe koloka maka, tamba sa ema sira nee la tuir votasaun?, Partispasaun sidadaun nian iha eleisaun presidensial nebe minimu tebes nee karik nakasalak iha fukun ruma? Resposta ba perguntas nee, tuir resultadu analiza hatudu katak iha fator rua sai obstaklu boot ba povu atu partisipa iha eleisaun presidensial mak lei eleitoral nebe la fo espasu ba vota libre no fator seluk mak kondisaun geografikamente nebe halo ema ida idak fila fali ba vota iha ida idak nia suku ka knua.

Hakarak ka lakohi nivel partisipasaun sidadaun nian iha festa demokrasia nee sai preokupasaun ba ukun nain, li-liu orgaun eleitoral sira, CNE no STAE, atu oinsa antisipa akontesimentu hanesan iha eleisaun parlamentar Julhu mai.

“Ha’u haree falla ruma ne’ebé akontese iha eleisaun prezidensial laiha edukasaun sivika, laiha mobilizasaun povu vota, tanba ne’e ema barak la tuir votasaun ha’u la fiar, tanba labele vota iha fatin ne’ebé o hela dadaun ne’ebé uluk rejista,”. Jose Ramos Horta.

Los duni senhor, eleisaun presidensial tinan nee laiha edukasaun sivika, laiha mobilizasaun povu ba vota hodi nunee ema barak latuir votasaun. Ne’e akontese tamba lei eleitoral Parlamentu nasional aprova iha tempo nebe Presidente Republika dekreta ona data eleisaun presidensial.

Eleisaun presidensial bele dehan sai referensia ba eleisaun parlamentar mai. Tan nee difisensia sira iha lei eleitoral nebe sai obtaklu ba vontade povu nian atu partisipa iha festa demokrasia nee tenki hadia hodi asegura partisipasaun sidadaun nian iha eleisaun parlamentar mai.

Agora atu hadia lei eleitoral hodi motiva povu partisipa iha eleisaun, nee kompetensia politiku nain sira iha Parlamento Nasional. Tamba produtu lei  ida tenki benefisia povu ema em jeral, labele iha pensamento ida katak lei nee benefisia ba partido hau nia partido ka ninia partido. Produtu lei labele serve deit ba intrese partido politiku sira maibe intrese povu tomak nian.

Ne’ebe avalaisaun jeral ba eleisaun presidensial 2017 nee hatudu katak lei eleitoral la fasilita povu partisipa iha eleisaun. Tan nee hakarak ka lakohi, simu ka lasimu, lei eleitoral nee tenki hadia duni, atu nunee eleisaun parlamentar mai povu hotu partisipa iha eleisaun hodi hili partido politiku nebe diak, ho vizaun no programa nebe diak.*