Ezekusaun OJE 2017, SEPFOPE Atinji 47%

DILI – Ezekusaun Orsamentu Jeral Estadu (OJE)  2017 husi Sekretariu Estadu Para Politika Formasaun Professional e Empregu (SEPFOPE) atinji 47%.

Tuir SEPFOPE, Ilidio da Costa Ximenes, OJE 2017 montante miliaun U$ 8,251, maibe ezekusaun orsamentu lao ona, osan transfere ba sentru formasaun Tibar ba pagamentu no konstrusaun estrada.

Konaba  ezekusaun  SEPFOPE laduvidas  tanba tinan-tinan  sempre ezekusaun lao diak, iha tinan  2017  ezekusaun  lao hela  atinji 47% fiar katak, bele too  98%,’’dehan Ilidio ba jornalista  iha Edifisiu Kompania Tobishima Comoro, Dili,  Kinta (20/04/2017).

Nia hatete, ezekusaun SEPFOPE kada tinan lao diak, ezekusaun orsamentu hotu, la fila ba kofre estadu.

Iha parte seluk Ministru Estadu Kordenador Asuntu Ekonomia e Ministru Agrikultura e Peskas Estanislau da Silva hatete, ezekusaun OJE 2017 MAP  lao diak, maibe perzentajen hira ladun lembra, maibe ezekusaun lao  liu  fokus program prioridade area agrikultura, floresta, pekuario, kuda aihan ba animal, iha capital dezenvolvimentu lao hadia irigasaun balun, sosa traktor foun 12 agora dadaun loke tenderizasaun ba kompania sira neebe iha interese sosa traktor sira nee.

Ami nia programa agrikultura involve joven sira partisipa setor agrikultura, neebe programa nee  iha tinan kotuk involve  joven barak, kuaze ema nain 90, hau hanoin ezekusaun OJE MAP lao diak, laiha problema ida,” dehan nia.

Nunee mos Reprezentante povu iha uma fukun Parlamentu Nasional (PN) Komisaun C Antoninho Bianco hatete, Ezekusaun OJE 2017  governu seidauk apresenta iha PN, maibe tinan nee TL hasoru festa demokrasia rua eleisaun presidensial neebe liu ona, hela eleisaun parlamentar, maibe espera sei halo servisu diak, sei laafeta ba ezekusaun, tanba membru governu balun involve partido politika maibe diretor jeral no nasional kontinua halo servisu makina estadu lao hela.

“Ami halo avaliasaun sira seidauk hatoo relatoriu primeiru trimestral mai iha PN, ezekusaun porzentu hira, maibe fiar sira halo servisu diak, labele afeta ezekusaun oje, hanoin ezekusaun lahotu fila ba kofre estadu, importante ezekuta tuir programa no planu neebe aprova iha PN, garantia kualidade no fo benefisiu ba povu no estadu,’’dehan nia. Josefa dos Santos/ Joao Fatima

Suara Timor Lorosae