sábado, 22 de abril de 2017

Prezidente eleitu timoroan lidera veteranu timoroan sira iha vizita ba Austrália

PARTILHAR
Prezidente-eleitu timoroan, Francisco Guterres Lu-Olo, lidera delegasaun ida hosi veteranu timoroan sira ne'ebé semana ne'e halo vizita iha Austrália, no partisipa iha eventu prinsipal sira ne'ebé marka, loron-tersa, loron memória nian ne'ebé koñesidu ho naran Anzac Day.

Komemora antes hodi fó homenajen membru sira hosi Australian and New Zealand Army Corps (ANZAC) ne'ebé luta ona iha Gallipoli iha Funu Mundial DAhuluk, Anzac Day (25 Abril) agora hanesan loron memória ida hosi ema sira ne'ebé "serbi no mate ona iha funu sira, konflitu sira no operasaun sira dame nian".

Veteranu timoroan sira sei halo enkontru sira ho grupu konjéneru australianu sira, sei vizita organizasaun sira apoiu nian ba veteranu sira funu nian no sei partisipa iha serimónia sira.

Ne'e hanesan tinan haat konsekutivu maka delegasaun ida hosi veteranu timoroan sira, barak liu hanesan eis-elementu sira hosi frente armadu rezisténsia timoroan nian, Falintil, vizita Austrália tanba okazisaun Anzac Day nian.

Aleinde Lu-Olo, iha delegasaun ne'e mós sei halo parte hosi ministra Solidariedade Sosial, Isabel Guterres, no Inês Almeida, ofisial hosi Ligasaun ba Asuntu sira Veteranu nian hosi gabinete primeiru-ministru nian.

Delegasaun sira sei ba Hobart, Canberra no Brisbane no sei halo vizita badak ba sentru rejional sira hosi Townsville, iha Queensland, ho Yass, iha New South Wales, haktuir hosi informasaun ne'ebé ezekutivu hato'o iha komunikadu.

Iha Townsville, sira sei vizita kuartel Lavarack, sede hosi Brigada Ezérsitu australianu nian, ne'ebé konstitui núkleu hosi INTERFET, Forsa Internasional Dame nian hosi ONU ba Timor, iha 1999, no hosi Operasaun Astute, iha 2006, iha Timor-Leste.

Veteranu timoroan sira sei vizita mós delegasaun sira hosi Liga militar australianu sira, veteranu sira no sira ne'ebé iha ativu, nune'e mós organizasaun sira apoiu nian ba antigu ofisial no militar sira iha ativu, hanesan Mates4Mates, Veterans Care Association ho Solider On.

"Iha sira hotu, sei halo parte hosi funsionamentu hosi serbisu sira ne'e, hodi avalia viabilidade hosi kriasaun ba estrutura sira apoiu ne'ebé hanesan iha Timor-Leste", explika hosi ezekutivu.

Agio Pereira, ministru Estadu nian no porta-vós Governu nian, konsidera ona katak vizita "kontinua hametin amizade ida ne'ebé hahú hosi Funu Mundial Daruak, bainhira ema timoroan sira fó asisténsia ba komando australianu sira, ho sakrifísiu boot".

"Iha tinan hirak ne'e, harii ona relasaun foun ida entre komunidade sira veteranu nian, ne'ebé destaka susesu hosi inisiativu Timor Awakening. Lasu sira entre komunidade sira veteranu australianu nian no Timor-Leste hanesan ezemplu di'ak tebes hosi espíritu amizade ida ne'ebé karakteriza hosi koperasaun no respeitu maka'as", nia hatutan.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: