quarta-feira, 5 de abril de 2017

HUSI TRUMP IHA EUA NO BREXIT BA POVU REINU UNIDUS… – opiniaun iha Rádio Liberdade

HUSI TRUMP IHA EUA NO BREXIT BA POVU REINU UNIDUS TO LUIS TILMAN IHA TIMOR LESTE KOMUNIKASUAN POLITIKA NEBE REALISTIKU SEI LORI VITORIA INSERTEZA


Radio Liberdade Online - Opiniaun ne'e ninia kontiudu tomak responsavel husi hakerek nain no instituisaun. Redasaun fo espasu menu ne'e hodi ejerse ema no instituisoens nia hanoin no ideias konaba asuntu ruma ba prosesu dezenvolvimentu Timor-Leste.

Mundu admiradu!. Ida ne’e mak sai debates iha fatin hotu hotu wainhira Trump hetan vitoria hodi sai Presidente Estadus Unidos Amerika (EUA) husi ninia  konkorrentes Hillary Clinton.

Imagina tok Donald Trump nebe laos mai husi eleite polítikus sira, laiha filiasaun polítika nebe klara tamba dalaruma fo mos ninia  kontribuísaun  fundos ba kampanha polítika husi partidu demokrata no republikanu, bele fo derrota ba Hillary Clinton nebe kunhesidus tebes iha mundu no mos iha influência nebe boot iha partido Demokratas. Hillary Clinton, eis primeira dama husi presidente  Bill Clinton (1992 - 2000) eis-senador husi Nova Iorque (2002 - 2008), eis-ministra estrangeiros 2008 – 2012 tengki simu ninia derota nebe nia rasik nungka bele espera bele akontese iha eleisaun 2016.

Derota husi Cliton  hamosu  vários manifestasoens nebe laos deit akontese iha rai laran mais akontese iha nasaun seluk. Apoiantes Clinton sira iha esperansa boot katak Hillary Clinton sei sai feto dahuluk nebe sei  sai presidenti Estadus Unidos Amerika iha istoria pais nee nian tengki  akaba ho  derrota nebe apoiantes sira rasik la fiar to ohin loron..

Tambasa Donald  Trumph bele hetan vitoria sai Presidenti EUA ? Analiza no espekulasaun barak mak mosu iha publiku. Maibe entre espekulasaun hirak ne’e, journal famozu sira iha EUA no Europea fo ninia analiza nebe hanesan. Tamba nia uza ninia  inteligente ba situasoens frustrasaun husi sidadaun EUA  ba  governasaun Barack Obama nebe tuir povu iha area fronteiras no grupu marjinaladu sira katak Obama lahatudu ninia seriedade hodi liberta povu EUA sai husi moras sosiais nebe sira infrenta lor loron.

Situasaun hirak ne’e sai indikadores forte  Trump hodi provoka emosaun publiku liuhusi journais ho ninia liafuan “ HAU LAOS EMA  PARTE HUSI WASHINGTON NIAN, HAU EMA LIUR NO DOK HUSI WASHINGTON”.

Nune’e mos iha  fatores internais sira seluk nebe fo vitoria ba Donald Trump. Hanesan  kapasidade  Trump hodi artikula valores  Partido Republikano ho ninia lema “'Make America great again” nebe kontraditoriu ho lema husi Clinton nian “'Stronger together” ho ninia prediksaun katak lema husi Clinton ladun klaru atu publiku entira didiak sentidu husi lema ne’e..

Fatores internal seluk mak Trump konsege konstrui  karateristika lideransa nebe hakarak hamosu buat nebe Trump sempre dehan  ‘MEHI EUA NIAN” Trumpgaranti katak  EUA sei bele sai pais nebe boot iha mundu wainhira lideradu husi ema nebe iha susesu hodi lahare ba ninia komportamentu moral nebe komprovada iha passadu.

Vitoria husi Trumph hamosu protestu iha fatin barak husi EUA. Povu barak mak lamenta tebes ba vitoria nebe povu EUA konsidera nudar vitoria traisaun tamba iha involvimentu parte esternal husi rai seluk. BBC iha ninia reportajen 9 Novembru 2016 fo sai katak vitoria husi Trumph  tamba nia uza senariu 5 hanesan aprosima ba grupu marjinaladu sira nebe nungka hetan atensaun husi Governu Sentral, uza anekdota komik hodi kontra ninia inimigu politiku sira no barani hasoru ninia adversariu politiku sira nebe mak iha poder, sadik autoridade kompetenti sira hodi koalia lia los kona ba aktus husi ninia advesariu politik sira wainhira hetan poder no ikus liu Trumph fiar ba ninia palpitu.  Reasaun ba vitoria Trumph hetan reazen husi mundu tomak inklui media hotu hotu. Journal The Guardian husi Reinu Unidus fo sai katak vitoria Trump sei lori  EUA ba futuru insertu. Revista Daily Miror iha ninia pajina oin fo sai  figura estatua Liberty nakfilak tiha nia an hodi liman rua taka nia oin ho titlu” Ida ne’e mak Presidenti Trump; Saida mak sira halo tiha ona?. The Daily Telegraph, 9 Novembru 2016 iha  pajina oin fo sai ‘NAI MAROMAK SALVA EUA BA, Presidenti EUA mehi at.

Protestu hirak nebe mosu to ohin loron ba Presidenti Eleitu Trumph kuntinua lao nafatin iha fatin barak depois nia foti avizu makas hodi bandu ba sidadaun husi nasaun muslimanu 7 atu tama ba iha EUA. Trumph hatene katak desizoens nebe nia foti hamosu risku boot ba vida povu  EUA  ba futuru. Karik ida ne’e mak Trumph hakarak halo hodi justifika ninia liafuan katak HAU LAOS EMA PARTE HUSI WASHINGTON NIAN. Katak buat nebe mak nia halo tamba nia senti iha ninia vida moris lor loron wainhira nia hare Washington halo desizaun barak nebe mak kontra povu hirak nebe laos parte husi Washington nian intereses. Reflesaun badak husi vitoria Trumph nebe ema hotu la espera wainhira nia kandidata an ba Presidenti loke ita hotu hotu nia hanoin katak wainhira uza linguasem politika nebe bele provoka  ema nia emosaun ba situasaun atual, bele sai alternativas hodi hetan kunfiansa.

Husi Reinu Unidus wainhira realiza referendum Brexit iha 23  junho  2016 sai  exemplo ba dezastre komunikasaun politika UK nian nebe  lamentável tebes.Tamba depois anusiu rezultadu ne’e, mosu  aspirasoens iha UK ho naran Bremain nebe hakarak atu UK mantein ninia pozisaun nafatin iha Uniaun Europea  no mos atitude arrepende ho naran Bregret nebe refere ba desizaun nebe lamentavel tebes hodi halo UK sai husi Uniaun Europea.

Resultados surpresa referendo Brexit ne’e sai estudo de caso nebe interessante ba ita hotu. Liu liu sai lisaun  aprendizagem nebe valiosa tebes  baprofissionais  comunicação sira kona ba oinsa  falhansu comunicação no mos utilização media hodi realiza ninia propósito no objetivos.  Frakezas boot hodi hare  sabedoria  multidão nebe esplaha iha publiku no mos oinsa  conteúdo husi notícias bele  influência publiku  nebe dalawain  tendenciosa sei bele halakon kunfiansa publiku.

Realidade hatudu  katak, referendo nebe halao tiha ona iha UK nebe hetan vitoria hodi foti desizaun saihusi Uniaun Europea laos desizaun nebe mai ho spontania. Maibe maioria desizaun hodi husu sai husi Uniaun Europea ne’e mai husi idade adulta,  idosos no funsionarius reformadus sira. Maioria grupu hirak ne’e mai ho nivel edukasaun kiik, nível  rendimentu mos kiik no  maioria  mesak leigo política sira. Grupu hirak ne’e rekunhese tebes katak  razaun fundamentu hodi foti desizaun sai husi Uniaun Eurpea tamba deit desizaun politika, ekonomia, sosial no seluk tan la dun fo importansia ba sira hodi fo deit favoritismu ba grupu eleitu deit.

Tamba deit ho ninia perfil mai husi grupu marjinaladu hirak ne’e, rezulta ninia eleitores ladun hetan atensaun husi eleite politiku sira nebe to ikus mai desizaun hodi sai husi UE hamosu hela tristeza boot ba grupu eleite sira iha UK. Grupu hirak ne’e firme metin katak sira nia prezensa iha UK, lider konsidera laos pesoal importante no defini sira nudar pesoal undecided voters. Swinging voters. Floating mass no pior liu nungka hakbesik ba sira depois de ukun.

Iha rai laran, Luis Tilman, kandidatu simplis nebe mai husi Ermera ho modalidade SD klas 5 ladun hetan atensaun masimu iha publiku wainhira nia halo kampanha tama sai knua iha parte Ermera nian. Maibe saida mak akontese depois nia koalia iha publiku liuhusi transmisaun direita 17 Marchu 2017 husi RTTL.EP, Luis aprezenta filozofia foun ba palavras palavras komunikasaun politika nian nebe atrai tebes publiku. PREMAN POLITIK, HAU EMA AILEBA NO HAU EMA SIMPLIS hamosu alergia simplis ba publiku sira nebe hakarak ona atu iha palavra palavra diferenti husi palavra anterior sira nebe povu rona tiha ona maibe laiha realidade.

Debates nebe aprezenta kandidatu nain 8 ne’e hamosu mos kualidade kada kandidatu nebe proporsional tebes entre linguasem nebe mak atrai publiku. Luis Tilman lakohi atu koalia saida mak nia sei halo maibe nia koalia saida mak nia hare ba fenomenu sosiais ne’e. Tatoli mos nia liafuan ba kandidatu sira seluk atu bele kombate premanismu politik iha instituisaun estadu sira sai palavra foun iha konjutura komunikasaun politika  ita nian.

Realidade hatudu wainhira Luis Tilman uza espasu publiku liu liu kanais media hodi koalia situasaun atual nebe povu infrenta lor loron, porsentajem votus ba nia sae makas no okupa iha 5 lugar husi kandidatu nain 8 nebe tuir lolos tengki hetan porsentu makas liu  kompara ho Luis.

Perguntas ba ita hotu tambasa Luis Tilman, ho nia modalidade SD klas 5 bele ganha votus barak liu fali kandidatu nain 3? Iha jestaun Komunikasaun politika hodi ataka ninia adversário politika hodi  hamosu opiniaun negativus  la eficaz  ona tamba  eleitores sei  aseita hodi defini ninia  pozisaun ba lianguasem komunikasaun sira nebe transmiti tamba realidade nebe publiku infrenta. No ida ne’e halao duni husi Luis hodi tatoli hela lian fuan nebe nakonu ho realidade saida mak povu infrenta no asisti iha sira nia vida moris lor loron. Publiku la hare ona ba ninia modalidade SD klas 5 maibe publiku presiza ona iha palavra palavra onestidade, realistiku nebe bele fo resposta ba saida mak sira hasoru iha sosiadade nia leet.

Maske to ikus Trump sai Presidenti EUA, Povu Reinu Unidus sai duni husi Uniaun Europea no Luis lakon ninia vitoria iha eleisaun presidensial ida ne’e, maibe iha buat ida nebe fundamentu tebes atu sai referensia ba liders partidu politiku sira hodi halo nia ezame de linguasem palavras politika nebe atu fo ba publiku.Dahuluk tenta atu halakon ona palavra palavra heroismu ba buat nebe mak halo tiha ona. Tamba publiku onestamente la senti saida mak akontese tiha ona. Daruak; aprezenta realidade no fatus ba publiku tamba sa labele ezekuta no oinsa atu bele ultra passa hodi nune’e publiku bele hetan ninia resposta ba duvidas nebe mak sira hetan iha terenu. Datolu, minimiza ona palavra palavra provokativus tamba saida mak ita koalia ne’e dalaruma sei sai at liu wainhira hetan ou kaer ukun. No ikus liu area de konsentrasaun ba media tengki iha ninia balansu ba   se mak kontrola media hodi bele halo  agenda polítika tuir ninia ideologia no prinsipius nebe bele fo  benéfico através husi notíciasnebe mak fo sai hodi bele hamosu  opinião pública tamba utiliza espasu publiku.

Sem comentários: