Kaboverde sei simu enkontru emprezáriu luzófona ho xinés nian sira

Emprezáriu luzófona no xinés atus tolu maka sei bá sidade Praia, fulan juñu agora, hodi halo parte iha enkontru internasionál, atu debate kona-ba oportunidade koperasaun entre Xina ho Komunidade Nasaun Lian Portugés (CPLP), tuir organizasaun refere fó sai horisehik. 

Tuir prezidente Kaboverde, TradeInvest, Ana Lima Barber, sorumutu ne’e sei hala’o iha loron 16 to’o 18-juñu, ho lema “Promosaun oportunidade ba koperasaun ekonómika entre Xina ho Komunidade Nasaun Lian Portugés sira”.

"Ideia maka atu aumenta troka komersiál, fasilita enkontru hothotu liu-liu ba empreza kiik no media sira, hodi nune’e bele identifika merkadu foun nomós esplora sinerjia, aproveita plataforma Kaboverde, hanesan nasaun estável, demokrátiku, situa iha fatin ne’ebé di’ak no sai hanesan mos pontu fokál ba mundu", tenik Ana Barber, no sita hosi ajénsia notísia kaboverdiana Inforpress.

Prezidente Kaboverde TradeInvest, hanesan ema ne’ebé responsabiliza ba promosaun esportasaun no atrasaun investimentu estranjeiru, konsidera katak enkontru ne’e hanesan oportunidade ba arkuipélagu ne’e hodi hatudu ninia potensialidade.

"Ami hakarak aposta ba parseria entre empreza lokál ho estranjeiru sira, ba iha setór indústria, peska no enerjia renovável ne’ebé sai nu’udar área importante sira ba dezenvolvimentu nasaun nian", apontou.

Tuir Ana Barber, koperasaun ekonómika ne’e importante ba dezenvolvimentu no kresimentu hosi Komunidade Nasaun Lian Portugés (CPLP) no responsável ne’e hatene katak Kaboverde bele sai hanesan plataforma entre Xina, nasaun hothotu hosi komunidade luzófona nomós hosi Áfrika Osidentál.

Sorumutu ne’e sei konta ho partisipasaun hosi emprezáriu Xina, Angola, Kaboverde, Mosambike, Brazil, Portugal, Guiné-Bissau no Timor-Leste, ne’ebé hamutuk besik 300.

SAPO TL ho Lusa