sábado, 1 de abril de 2017

Kaer ona líder hosi grupu musulmanu ne'ebé organiza protestu sira hasoru governador iha Jakarta

PARTILHAR
Polísia Indonézia nian hatete ona katak prende ona líder hosi grupu musulmanu ida no ativista na'in haat seluk tanba suspeita ba traisaun, iha hotel ida iha sidade Jakarta iha loron-sesta dadeer ne'e.

Porta-vós hosi polísia Jakarta nian, Argo Yuwono, hatete katak Muhammad Al Khathath, líder hosi grupu Muslim Peoples Forum, hanesan suspeitu ba envolvimentu iha konspirasaun ida hodi halo traisaun.

Forum, ne'ebé inklui grupu Muslim Peoples Forum, iha ligasaun ba protestu oioin hasoru governador Jakarta nian, Basuki Tjahaja Purnama, ne'ebé koñesidu ho naran "Ahok", hosi minoria kristaun, ne'ebé hetan daudaun julgamentu tanba deskonfia halo blasfémia hasoru Alkoraun.

Yuwono hatete ona katak ativista islámiku na'in haat seluk kaer ona iha loron-sesta ne'e.

Indonézia iha populasaun musulmanu boot liu iha mundu, ne'ebé halo parte hosi 87% resin hosi nia populasaun hamutuk millaun 260.

Maski hosi maioria indonéziu musulmanu sira hanesan adeptu ba toleránsia relijiozu, fundamentalizmu hetan daudaun forsa hahú hosi final sékulu liubá ho grupu sira hanesan Frente Defensor Islaun nian, ida ne'ebé ativu liu iha fulan hirak ikus ne'e, inklui iha kampaña eleitoral iha Jakarta.

"Ahok" hetan akuzasaun halo blasfémia hasoru Islaun tanba deklarasaun ida ne'ebé nia halo iha fulan-Setembru nia rohan, bainhira nia klasifika hanesan sala interpretasaun hosi teólogu musulmanu sira balun hosi versíkulu ida hosi Alkoraun nian, ne'ebé hatete katak ema musulmanu ida bele hili de«it dirijente musulmanu ida.

"Ahok" husu ona deskulpa tanba komentáriu, maibé la sufisiente hodi hapara konservador sira nia hirus, liuliu hosi Frente Defensor Islaun nian, grupu ida ne'ebé hakarak hala'o lei islámiku ('sharia') iha Indonézia.

"Ahok" hanesan governador kristaun daruak iha Jakarta hahú hosi Indonézia deklara independénsia iha tinan 1945 no hanesan ida dahuluk hosi etnia xineza ne'ebé maka governa iha sidade.

Nia hanesan koñesidu entre klase média iha Jakarta, maibé nia pozisaun firmi hasoru korupsaun no planu urbanístiku sira ne'ebé nia halo, hodi hasai ona ema kiak millaun resin hosi bairu kiak sira, halo nia hetan inimigu sira.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: