FAVOR IDA, CAMARADA PRESIDENTE

Celestino Gusmão*, Díli

"Nudar loron matan foun mosu mai, Fo kbit Naroman ba povu no Nasaun, Prezidente ba Povu tomak". Ba povu tomak duni, la'ós de'it ba imi, la'ós de'it ba sira, basa, sei sai servidor povu tomak nia.

Parabens ba Exelénsia nia susesu hodi asume knar importante ida iha ita nia nasaun, no hatoo obrigadu barak ba Exelénsia Sr. Dr. Francisco Lu Olo nia korajen atu Kontinua servisu ba povu TL.

Favor ida

Favor Camarada Prezidente, presiza garantia duni funsionamentu normal instituisaun demokratiku sira. Garantia ba ami katak sei laiha tan mal nutrisaun kroniku ba oan sira, garantia katak sei laiha tan oan sira iha eskola laiha bee no saneamentu, favor Prezidente, garantia mai ami katak sei laiha tan sidadaun ida mak mate tanba inkapasidade rekursu ospital sira nia. Favor Prezidente, garante mai ami katak sei laiha tan sidadaun ida mak mate masakradu hanesan Sr. Mauk Moruk ho nia maluk sira iha 2015, favor Prezidente, garantia mai ami katak sei laiha tan tribunal Politika iha Parlamentu Nasional hodi kondena sidadaun sira liu husi rezolusaun parlamentar, iha de'it mak funsionamentu ba lei ho nia propriu prosedimentu rasik. Favor Prezidente, garantia ba ami katak estadu tomak sei hametin dalan legal hotu atu evita ema balun riku demais iha ita nia rai, enkuantu ema seluk moris mizeriavel.

Espera katak promesa hotu husi Exelénsia ba povu no nasaun labele monu de'it ba rai. Fiar metin katak Exelénsia nia prezensa nudar parte husi solusaun ba problema hotu-hotu ne'ebé Povu, liu-liu sira ne'ebé vulnerable liu enfrenta.

Lia menon nudar sidadaun ida ba Prezidente eleito!

A Luta Kontinua!

Maubere Gusmao – iha Facebook