sábado, 1 de abril de 2017

Timor-Leste aprova ona protokolu koperasaun ho Portugal ba patrimóniu arkivístiku

Timor-Leste aprova ona, iha Konsellu Ministru, asinatura ba protokolu koperasaun ho Portugal hodi rai no ba divulgasaun patrimóniu arkivístiku, fó sai hosi komunikadu ida hosi Prezidénsia Konsellu Ministru timoroan nian iha loron-sesta ne'e.

Tuir nota, akordu ne'e abranje transferénsia hosi koñesimentu, formasaun no dijitalizasaun hosi dokumentu sira ne'ebé iha ligasaun ho Istória no tema sira seluk.

"Aleinde ne'e, tuir objetivu sira hosi Komunidade Nasaun sira ho Lian Portugeza (CPLP), ne'ebé haree ba rekuperasaun hosi arkivu istóriku hosi sira nia Estadu-membru no kriasaun ba mekanizmu sira ne'ebé fasilita prezervasaun no divulgasaun hosi patrimóniu komun ne'e", refere hosi komunikadu.

Tuir dokumentu, "Arkivu Nasional Timor-Leste nian, ne'ebé kaer hosi Diresaun-Jeral hosi Arkivu Nasional hosi Ministériu Administrasaun Estatal, no Arkivu Nasional Torre do Tombo, hosi Portugal, kaer patrimóniu dokumental ne'ebé bele kontribui hodi estimula troka informasaun sira ho interese hanesan ne'ebé moris iha arkivu rua ne'e no ne'ebé hanesan parte integrante hosi memória hanesan hosi nasaun rua ne'e".

Iha reuniaun hanesan Konsellu Ministru nian, ne'ebé halo iha loron 28 Marsu, debate mós inísiu hosi prosesu formalizasaun ba adezaun Timor-Leste nian ba Banku Aziátiku Investimentu nian iha Infraestrutura, ne'ebé aseita kandidatura timoroan nian iha loron 23 Marsu.

Aprova mós asinatura hosi memorandu entendimentu entre Komisaun Nasional Kombate hasoru HIV/Sida Timor-Leste nian ho Komisaun Nasional Kombate hasoru HIV/Sida hosi Indonézia.

Akordu ne'e nia objetivu maka promove partisipasaun hosi komunidade nasaun rua ne'e iha programa prevensaun HIV/Sida nian.

Aprova mós rejimi jurídiku ba protesaun no konservasaun hosi biodiversidade Timor-Leste nian, estabelese prinsípiu sira no regra sira ne'ebé uza ba protesaun no konservasaun natureza nian, defini liuliu norma sira hodi proteje espésie sira ne'ebé protejidu no ba kontrolu hosi espésie ezótiku sira.

Ko'alia mós tema sira seluk iha reuniaun Konsellu Ministru sira nian, hanesan aprovasaun ba Polítika Jestaun Efikásia ba Ajuda Externu, ne'ebé nia objetivu prinsipal maka hametin atu asisténsia hosi parseiru sira dezenvolvimentu nian uza hodi kumpri planu no ba prioridade sira hosi Governu timoroan nian.

SAPO TL ho Lusa

Sem comentários: