Liu Husi BNCTL, Governu Fo Kreditu Ba Emprezariu

DILI – Governu aloka orsamentu miliaun U$ 2 ba Banku Nasional Comersial Timor Leste (BNCTL) hodi apoiu kreditu ba emprezariu sira no negosiante kiik atu halo negosiu.

Ministru Estadu Kordenador Asuntu Ekonomia e Ministru Agrikultura e Peskas Estanislau da Silva hatete, governu esforsu   halo lei bankaria oinsa garantia bankaria, tanba osan estadu nian, tenke iha kriteria mekanismu diak, atu nunee emprezariu asesu kreditu maibe tenke selu banku nian osan.

Ami tau osan miliaun U$ 2 iha BNCTL hodi apoiu emprezariu asesu kreditu, neebe servisu lao, governu apoiu setor privadu sira promove sira nafatin, oinsa sira bele halo atividade negosiu, no investimentu diak iha TL, “dehan Estanislau liu husi sesaun plenaria   iha PN, Tersa (18/04/2017).

Nia hatete,  Governu  koalia banku central  TL  oinsa hare garantia bankaria,  hanoin lei aprova, espera bele fo kreditu ba emprezariu timor oan, oinsa hodi proteze sira hetan kondisaun diak, importante lei rai, aprova hodi fo garantia banku hodi fo kreditu ba timor oan sira. Governu kontinua promove setor privadu nasional, oinsa sira ajuda estadu halo investimentu iha rai laran, kria kampu servisu ba timor oan.

Nia hatete, Governu liu husi ajensia trade invest  fo  ona sertifikadu Investimentu hamutuk 150  ba investidor  estranjeiru no nasional.

Investimentu simente, sei harii iha Baucau, heneiken  produs tua service iha Hera, harii hotel iha tasi tolu area turismu, bele kontribui fo reseitas ba estadu, tanba durante reseitas domestika tun, importante halo oinsa atrai investor estranjeiru tama barak bele ajuda dezenvolve ekonomia rai laran lao diak, neebe xina halo atividade kiik sira lahetan sertifikadu investimentu.

Iha fatin hanesan Deputadu Eladio Faculto de Jesus bankada Fretelin hatete, setor privadu sai parseiru governu hanoin governu tenke apoiu asesu kreditu iha banku hodi halo investimentu hodi kria kampu servisu ba joven sira, laos setor privadu hein projetu governu nian, hanoin diak, parte ida, ajuda hetan osan husi projetu atu investe iha setor produtivu.

Maibe importante ekonomia lao diak, labele xina domina, halo negosiu, governu tenke apoiu setor privadu asesu kreditu finanseiru iha banku hodi halo atividade ekonomia no investimentu iha rai laran, tanba setor privadu hasoru problema finanseiru,’’dehan nia.

Nia hatete, oras nee dadaun xina domina halo atividade ekonomia iha rai laran, tuir lolos ema estranjeiru mai halo investimentu, laos halo negosiu, hadau malu ho timor oan sira.

Nunee mos Diretor Ezekutivu CCI-TL Nuno Trindade hatete, setor privadu sai parseiru governu nian, prontu apoiu programa no politika planu governu halo dezenvolvimentu ekonomia iha rai laran, maibe importante governu tenke apoiu setor privadu sira asesu kreditu iha banku hodi halo investimentu.

“Tanba setor privadu problema neebe ami detekta falta kapasidade finanseiru no falta kuinesementu halo jestaun diak ba sira nian, negosiu, tanba nee ami husi CCI-TL koalia banku Central ho governu ho banku ANZ fo trenamentu ba emprejariu iha area jestaun no akuntabilidade, atu nunee bele hasae sira nian, kuinesementu no abilidade, wainhira hetan kreditu husi banku BNCTL bele halo negosiu diak,” dehan nia. Josefa dos Santos

Suara Timor Lorosae