PR ELEITU HUSU BA XEFI SUKU HOTU, PARTISIPA IHA SEREMONIA TOMADA DE POSE

Primeiru Ministru (PM) Rui Maria de Araujo informa katak, Prezidenti Republika (PR) eleitu, Francisco Guterres Lu-Olo hakarak konvida Xefi Suku sira hotu-hotu, atu partisipa iha seremonia tomada depose Prezidente Republika nian iha 20 de Maiu.

“Prezidenti Republika eleitu, husu ba Governu atu haree posibilidade lori Xefi Suku sira ho nia estrutura suku hotu-hotu, atu mai partisipa tomada depose iha Tasi Tolu, iha loron 20 Maiu ne’e. Nune’e sei koalia ho  Ministeriu Administrasaun Estatal para serbisu atu haree ida ne’e,” hatete PM Rui Maria de Araujo hafoin enkontru ho Prezidente eleitu Francisco Guterres ‘Lu-Olo’, iha Sede Nasional Comite Central FRETILIN (CCF), Comoro, Dili, Kuarta (19/04).

Iha enkontru ne’e, Xefi Governu ho Xefi Estadu eleitu ne’e mós koalia konaba preparasaun ba seremonia tomada de pose ne’ebe hala’o iha fatin no data istóriku Tasi Tolu, 20 de Maiu 2017.

Nune’e mós iha enkontru ne’e, Xefi Governu mai reintera fila fali pozisaun Governu nian ba Prezidente eleitu konaba knar ne’ebe Governu hala’o maka fo apoiu ba desizaun ne’ebe Parlamentu Nasional ho Prezidente eleitu nia ekipa foti, eskoella fatin no prosesu atu hala’o seremonia tomada de pose nian.

“Perspektiva Governu nian hato’o ba PR eleitu katak, 20 Maiu sei haree seremonia sira  ne’ebe ita atu halo iha periodu ida ne’e, ninia hirarkia importante primeiru maka tomada de pose Prezidente eleitu,  inaugura siklu PR foun ida, segundu maka selebrasaun  tinan 15 ba restaurasaun independensia ninian, depois konferensia internasionais ninian,” Rui Araújo esplika.

Preparasaun fatin ba seremonia ne’e organiza husi Ministeriu Administrasaun Estatal (MAE) ho Ministeriu Obras Publika Transporte no Telekomunikasaun (MOTK), lojistika no protokolu ninian ne’e husi parte Ministeriu Negosiu Estranjeiru no Koperasaun (MNEK) mak responsabiliza.

Husi parte Ministériu Negosius Estranjeirus no Kooperasaun (MNEK) mós haruka ona karta ba bainaka internasional sira maibé to’o oras ne’e sei hein konfirmasaun fila fali husi MNEK.

Iha okaziaun ne’e, Prezidente Repúblika (PR) eleitu, Francisco Guterres Lu-Olo mos rekonhese iha enkontru ho Primeiru Ministru ne’e koalia mos kona ba atu konvida xefi Suku sira hotu hodi hola parte iha tomada de pose iha 20 Maiu.

“Ami koalia mos kona ba posilibidade konvida mos Xefi Suku ho orgaun Suku nian hotu-hotu iha Timor-Leste mai partisipa mos iha  ha’u nian seremonia tomada de pose iha Tasi Tolu ne’e,” PR eleitu haktuir.

Francisco Guterres ‘Lu-Olo’ eleitu iha eleisaun Prezidensiál iha 20 Marsu 2017, ho votus 295,048 ka 57,1 porsentu ne’ebé Tribunal Rekursu (TR) legaliza Lu-Olo nia vitória ne’e iha loron 30 fulan Marsu liu ba.des

Jornal Nacional Diário