Matéria HIV/SIDA sei Tama Kurríkulu Eskola

DILI: Ministériu Edukasaun (ME) konkorda ona atu hatama matéria kona­ba Human immunodeficiency virusinfection and acquired immune deficiency syndrome(HIV/SIDA) iha kurríkulu eskola nian.

Matéria ne’e la’ós espesífiku, maibé sei enkamiña iha matéria Biolojia nian.

Ministru Edukasaun, Antonino da Conceição hateten, matéria biolojia ko'alia kona­ba saúde publika, liuliu HIV/SIDA ne'ebé bele hanorin iha eskola hotu.

“Siénsia ita bele hanorin ba labarik sira oinsá bele halo pastamentu morál, relijiaun mós matéria ida ne'ebé bele uza hodi bele konxiénsia labarik sira hodi hasees­aan husi moras ne’e”, dehan nia, iha Salaun Bairru Grilus, horisehik.

Maski nune’e, nia dehan, atu diretamente hanesan matéria ida atu hanorin iha eskola, rekere mós ba kapasidade tékniku husi profesór sira tanba tenke preparadu atu hanorin siénsia ho dixiplina.

“Ita labele sente ita nia­aan dehan katak buat hotu­hotu ne’e sei tabu nafatin, tanba ne’e ha’u hanoin la’ós ona tempu atu ko'alia buat sira ne’e atu tabu. Labarik sira la'o rua­rua iha jardín laran ita haree hela, ne’e ita tabu halo saida”, dehan Ministru António.

Nia hatutan, buat ne'ebé atu apoiu nafatin husi edukasaun maka atraves relijiaun morál tenke liga ba muda komportamentu. Husi Biolojia ne’ebe labarik sira eskola tenke mós halo ligasaun ba moras reprodutivu ba moras HIV/SIDA.

Veronica Meles | Independente