Preparasaun Serimonia 20 Maiu Tasi Tolu Atinji 70%

DILI – Governu liu husi Ministru Administrasaun Estatal (MAE) neebe responsabiliza ba area tekniku hodi prepara ba serimonia 20 Maiu iha Tasi Tolu atinji ona 70%.

Tuir Ministru Administrasaun Estatal (MAE), Dionisio Babo katak, serimonia tomada pose no komemorasaun loron 20 de Maiu neebe sei realiza iha Tasi Tolu Dili oras nee atinji ona 70%.

Iha eventu rua, eventu ida tomada pose ba ita nia prezidente foun iha dia 19 kalan oras 00:00, depois 20 de Maiu isar bandeira ba loron restaurasaun independensia, nia progresu 70%,” dehan MAE, Dionisio ba jornalista sira iha edifisiu CNE, hafoin remata serimonia lansamentu relatoriu PDHJ nian, Caicoli-Dili, Kinta (20/04/2017).

MAE, Dionisio haktuir, oras nee parte Ajensia Dezenvolvimentu Nasional (AND) hadia hela fatin ba Tasi Tolu hanesan prepara palku, iha mos atividade seluk neebe sei halo durante loron rua nee. Husu konaba orsamentu hira ba komemorasaun nee, Dionisio dehan, montante alokasaun orsamentu serimonia tomada pose no komemora loron restaurasaun independensia nee seidauk klaru.

Iha fatin ketak, Primeiru Ministru (PM), Rui Maria de Araujo dehan, preparasaun ba serimonia tomada pose no komemorasaun loron 20 de Maiu teknikamente iha Ministeriu Administrasaun Estatal no obras publika mak haree. Raimundo S. Fraga

Suara Timor Lorosae