sexta-feira, 21 de abril de 2017

Mike Pence elojia valor demokrátiku no tolerante sira Indonézia nian

Visi-Prezidente Estadus Unidus nian, Mike Pence, elojia ona demokrasia indonéziu nian no nia islamizmu modernu, hafoin enkontru ida iha loron-kinta ne'e ho Prezidente hosi nasaun musulmanu boot liu iha mundu.

Komentáriu sira hanesan importnate tebes ba Prezidente indonéziu, Joko Widodo, ne'ebé loron ida antes hetan kontratempu polítiku ida, bainhira nia aliadu ida lakon ho konservador islámiku sira iha eleisaun ba governador Jakarta nian. Polémika kampaña ne'ebé halo fraku Indonézia nia imajen iha estranjeiru, hanesan nasaun musulmanu tolerante ida.

Iha konferénsia hamutuk ho Widodo, Pence hatete ona katak Estadus Unidus hakarak aumenta nia parseria estratéjiku ho Indonézia.

Visi-Prezidente norte-amerikanu elojia ona Indonézia tanba pratika Islaun ho dalan moderadu no hatete ona katak nasaun rua sei kontinua kopera iha kombate hasoru terorizmu.

"Hanesan demokrasia daruak no datoluk boot liu iha mundu, ami nia nasaun fahe valor sira ne'ebé hanesan, inklui liberdade, estadu direitu, direitu ema nian no diversidade relijiozu. Estadus Unidus iha orgullu hodi sai parseiru Indonézia nian, [ne'ebé] promove no proteje valor sira ne'e", nia afirma.

Donald Trump sei partisipa iha Simeira ASEAN iha Novembru

Visi-prezidente Estadus Unidus nian, Mike Pence, fó sai iha loron-kinta ne'e katak prezidente, Donald Trump, sei partisipa iha Simeira hosi Asosiasaun Nasaun sira Sudeste Aziátiku (ASEAN) nian, iha Filipina, iha fulan-Novembru.

Pence, ne'ebé halo vizita ida ba Indonézia, fó sai ona katak Trump sei partisipa mós iha Simeira hosi Sudeste Aziátiku nian ne'ebé sei hala'o hafoin reuniaun rejional, iha fulan hanesan, iha Filipina, no iha Simeira hosi Koperasaun Ekonómiku Ázia Pasífiku nian, iha mós fulan-Novembru, iha Vietnam.

SAPO TL ho Lusa | Foto@ Bay Ismoyo/EPA

Sem comentários: